Эртага 1-лига бор. Ҳакамлар қани?

Эртага биринчи лиганинг 2-босқичидан ўрин олган 9-тур беллашувлари ўтказилади. Навбатдаги турнинг барча саккизта ўйини бир кунга белгиланган. Аммо-лекин ПФЛ расмий сайтида 9-тур ўйинларини бошқариб борадиган ҳакамлар бригадаси ҳалиям эълон қилингани йўқ. Албатта, биз – ҳамкасблармиз, шундай экан, бировдан камчилик ахтариш ниятимиз йўқ. Лекин тур ҳакамларини вақтида бериб бориш уларнинг вазифаси эканлигини бир оғиз эслатиб ўтиш зарар қилмас. 

Бундан ўн кунча олдин иш юзасидан федерация биносига борганимда ҳакамлар ва назоратчилар бўлимида ишлаб келаётган Бобур Ҳайдаров билан гаплашиб қолдик. У кишидан нега ҳакамлар рўйхати вақтида матбуотга берилмаяпти деб сўраганимда, ўйинларни бошқариши керак бўлган ҳакамлар рўйхати ҳар доим тайёр туриши, фақат ПФЛ матбуот хизматидан ҳеч ким келиб сўрамаётгани учун вақтида сайтларда чиқмаётганини айтди. Эртага 1-лигада ўйинлар борлиги маълум. Аммо ҳакамлар ҳалиям эълон қилинмади. Бунинг сабаби эса бизга қоронғу. Эҳтимол, бу шанба-якшанба кунлари ПФЛнинг ишламаслиги билан боғлиқдир. Мана энди эртага сайтда чиқса керак, тур ҳакамлари бугун фалончи ўйинларни бошқаришади деб.

Ҳакамларни вақтлироқ эълон қилиниши нима беради? Масалан, вилоят клублари келаётган ҳакамларга олдиндан поезд ё самолётга чипта олиб қўйишлари лозим, бундан ташқари, ҳакамларнинг қаердан эканлигига қараб қайтиб кетиш учун йўлкира харажатларини ҳам тахлаб қўйишга тўғри келади. Аммо “қора либослилар” номи эълон қилинмаса аксарият клублар нима қилишни билмай ҳайрон қолишади ва ўйинга бир-икки кун қолганда шошиб қолишяпти. Шундай экан, ПФЛ бировлардан профессионалликни талаб қилгунча аввало ўзи бошқаларга ўрнак бўлса айни муддао бўларди.

Хайрулла ХОЛИҚОВ.