Элдор Каримов: "Про-лигада ўйнаш учун тажриба тўпладик"

Учрашувдан сўнг "Зомин" клуби сардори Элдор Каримов билан суҳбатлашдик.

- Даставвал, Про-лигага йўлланма олганимиз билан барча жамоадошларим ва мухлисларимизни табриклайман, - дея гап бошлади Каримов. Бугун “Чиғатой” жамоаси анча мазмунли ўйин кўрсатди. Айниқса, иккинчи бўлимда рақиб ҳисобда ортда қолаётган бўлса-да, охирги дақиқаларгача курашди. Шу томонлари билан менда ижобий таассурот қолдирди. Айтиш керакки, бугун кўп вазиятларда бизнинг омадимиз келди.

- Про-лига йўлланмаси учун кечган кураш борасида фикрингиз?
- Биз мавсум бошидан буён шу мақсад сари ҳаракат қилдик. Албатта, бунга осонликча эришмадик. Хусусан, иккинчи даврага келиб қийинчиликларга дуч келдик. Ўтказилган икки учрашувда ютқазиб қўйдик. Лекин жамоавий ҳамжиҳатлик эвазига вазифани бажардик.

- Мавсум давомида қайси жамоаларга қарши баҳслар “Зомин” учун қийин кечди?
- Осон ўйинни ўзи бўлгани йўқ. Дейлик, ҳар бир рақиб етарлича қаршилик кўрсатди. “Навбаҳор-Фарм”, “Нефтгазмонтаж” ва “Жомбой” клубларига қарши баҳсларда ҳакам томонидан қўшиб берилган дақиқаларда тўп йўллаб, ғалабани қўлга киритдик. Назаримда, “Зомин” учун мазкур ўйинлар қийин кечди.

- “Зомин” Про-лигада тўп тепишга тайёрми?
- Албатта, бунга тайёрмиз. Аввалги мавсумда ҳам Про-лигада иштирок этганмиз. Афсуски, ўз даражамизга ўйин кўрсата олмадик, кўп очколарни қўлдан чиқардик. Биринчи лигада ўйнаб, тажрибамизни оширдик ва Про-лигада муносиб иштирок этиш учун тайёрмиз. Тахминимча, таркибда ўзгаришлар бўлади. Мен Про-лигага олиб чиққан барча футболчиларни саклаб колишини истардим.

- Рақиблар дарвозасини 10 маротаба ишғол қилдингиз. Шундан 6 тасини пенальти орқали киритдингиз. Айтингчи, пенальти ижро этиш вақтида ҳаёжон кузатилмайдими?
- Албатта ҳаёжон кузатилади. Шундай ўйинлар бўлдики, ҳакам томонидан қўшиб берилган дақиқаларда уни ижро этиш  имконияти пайдо бўлди. Ўша вақтларда албатта менда ҳаёжон кузатилди.