Драган Скочич: "Натижага қандай эришдик дейсизми? Чунки биз кунига 20 соат ишладик"
22 июн 2021 16:57
Новости
![](https://championat.asia/upload/storage/644212_original.jpg)
![](/upload/storage/644212_220.jpg)
Драган Скочич: "Натижага қандай эришдик дейсизми? Чунки биз кунига 20 соат ишладик"
Эрон миллий жамоаси марказлашган тартибдаги ўйинлар старт олгунига қадар 6 очко билан 3-ўринда бораётганди. Биринчи ўринни Ироқ 11 очко, иккинчи ўринни Баҳрайн 9 очко билан эгаллаб турганди. Бир қарашда форслар учун вазият жуда оғир эди, бироқ улар бажариб бўлмас миссияни уддалай олишди.
Баҳрайнда ташкил этилган жаҳон чемпионати саралаш баҳсларида Эрон Гонконг, Баҳрайн, Камбоджа ва Ироқни мағлуб этиб 18 очко тўплаган ҳолда биринчи ўрин билан ҳал қилувчи раундга йўл олди. Терма жамоа Теҳронга қайтиб келгач, бош мураббий Драган Скочич иштирокида матбуот анжумани ташкил этилди. Хорватиялик мураббий муваффақият сабабларини келтириб ўтди.
- "Мен ўзимга ва жамоамга тўлиқ ишонаман. Эътиборни фақат ўйинга ва ишга қаратаман. Тўғри, бизни кўп танқид қилишди, лекин биз ишлашда давом этдик. Вазият жуда оғир эди. Аммо олдимизда 4та ўйин бўлиб, агар ҳаммасини ютсак кейинги босқичга чиқишимизни билардик. Чунки асосий рақибларимизнинг 3тадан ўйини қолганди".
- "Ҳар тўрт кунда майдонга тушиш осон эмас, бунда мураббий биринчи навбатда футболчиларнинг жисмоний ҳолатини назорат қилиб боради. ОФК биз жой олган гуруҳ ўйинларини Баҳрайнга берганида бу менга ёқмади. Лекин у ерга борганимиздан сўнг ташкилотчилик маъқул келди. Қарор қабул қилиб бўлинган, шу боис эътирозга ҳожат қолмаганди. Биз фақат ишлашда давом этдик. Ишонасизми, кунига 20 соатдан ишладик, бу эса ўз мевасини берди".
- "Эътибор берган бўлсангиз, ҳеч бир ўйинда Сардор Азмун, Меҳди Тареми ва Карим Ансарифадни бир пайтда майдонга туширмадик. Албатта, мен футболчиларни тушунаман, ҳамма футбол ўйнашни хоҳлайди, аммо биз учун натижа муҳим эди ва буни футболчиларга астойдил уқтирдим. Мен жамоа учун нима энг яхшиси бўлса, шуни бажаришга интилдим".
- "Ҳозирги пайтга келиб шартномам тугади, чунки иш муддати ЖЧ саралаш иккинчи босқич охиригача эди. Буёғига нима бўлишини федерация ҳал қилади. Шартномани узайтириш менга боғлиқ эмас. Мен фақат бир нарсани хоҳлайман: Эрон терма жамоаси 2022 йилги жаҳон чемпионатига чиқишини", - дейди Драган Скочич.
Похожие новости
![AMP Logo](https://championat.asia/image/logo-amp.png)
Комментарии