"Динамо"нинг БАА йиғинидаги рақиблари маълум

"Динамо" жамоаси Суперлига-2025 мавсумига тайёргарликнинг сўнгги босқичини Бирлашган Араб Амирликларида ўтказади. Бу ҳақида клуб матбуот хизмати хабар берди.

Вадим Абрамов мураббийлигидаги жамоа 12 февралда Тошкентдан Дубай шаҳрига жўнаб кетиб, 12 кун давомида 4та ўртоқлик учрашувида майдонга тушиши режалаштирилган.

Жумладан, Самарқанд клуби 15 февраль куни РПЛ етакчиларидан бири "Локомотив" (Москва), 17 февраль куни Тожикистоннинг амалдаги чемпиони "Истиқлол", 20 февралда Қозоғистоннинг кўп карра чемпиони, ўтган мавсум Конференциялар лигаси иштирокчиси бўлган "Астана" клубига қарши ўртоқлик ўйинида майдонга тушади. 22 февраль санасида 4-ўртоқлик ўйинида яна "Локомотив" билан учрашув ўтказилади. 

"Динамо" делегацияси 24 февраль куни Ўзбекистонга қайтади.

БААдаги ўртоқлик ўйинлари тақвими:

15 февраль. "Динамо" - "Локомотив" (Россия)
17 февраль. "Динамо" - "Истиқлол" (Тожикистон)
20 февраль. "Динамо" - "Астана" (Қозоғистон)
22 февраль. "Динамо" - "Локомотив" (Россия)