Дилшод Нуралиев: “Мустақил равишда ишлашни истаганим учун ёшлар терма жамоасига ўтдим”

Ёшлар билан ишлаш хадисини олган мураббий енг ишмариб ишга киришиш арафасида. Биз эса Нуралиев билан суҳбатлашиб, айрим саволларга жавоб олдик.

- Дилшод ака, яқинда ОТЖда мураббийлар штаби ўзгарди. Бунгача сизни ушбу жамоада кўраётган эдик. Эндиликда нима билан машғулсиз?
- Таъкидлаб ўтганингиздек, ОТЖда янги мураббийлар гуруҳи фаолият бошлади. Мен эса мустақил равишда ишлашни истаганим учун янги ташкил топаётган Ўзбекистон U-13 ёшлар терма жамоасини бошқаришни лозим топдим.  

- Сиз тилга олиб ўтган ёшлар терма жамоасининг илк йиғини таниқли мутахассис Аҳмаджон Мусаев бошчилигида ўтганди...
- Биласизми бу терма жамоа энди-энди тузилмоқда. Менимча терма жамоалар маркази томонидан яқин кунларда расман тасдиқланса керак.

- Бош мураббий ким бўлади?
- Жавобгарликни ўз бўйнимга олдим. Энди-энди ишга киришамиз. Дарвоқе, шуни ҳам айтиб ўтишни истардимки, 2000 йилда таваллуд топган футболчилардан иборат бўлган U-15 ёшлар терма жамоамизни бугунги кунда Темур Олимхўжаев бошқармоқда. Мураббийлар штабида ушбу мутахассисга ҳам ёрдам бериб борадиган бўлдим.

- U-13 ёшлар терма жамоасида ёрдамчиларингиз кимлардан иборат бўлади?
- Бу ҳақда ҳозирча ўйлаб кўрганим йўқ. Яқин орада бунга ойдинлик киритилса керак.

- Бошқарувингиздаги терма жамоанинг яқин орадаги режалари қандай?
- Буни терма жамоа маркази аниқлайди. Катта эхтимол билан йиғинлар январь ва февраль ойларидан бошланса керак.  

Исломбек Рустамбеков суҳбатлашди.