Дибала “Реал”дан учралган мағлубият ва “Барселона”га ўтиши мумкинлиги ҳақида гапирди

“Финал учрашуви ҳақиқий даҳшатнинг ўзи эди. Ҳаммаси тушда кечаётгандек эди назаримда. Финалга қадар биз жиддий рақиблар билан куч синашгандик ва уларга қарши учрашувларда иккитадан ошиқ гол ўтказмагандик. Улар эса бизга 45 дақиқада учта гол уришга эришишганди.

Футболда реванш учун ҳар доим имконият бўлади. Ушбу финалдаги аламли мағлубият доим мени хаёлимда бўлади. Қачонки ушбу мусобақада бош совринни бошим узра баланд кўтарсам, ўша алам мени тарк этиб, хотиржам бўлишим мумкин.

Ҳозир ҳамма “Барселона”да Неймарни ўрнини ким эгаллашини кутиб турибди. Кимдир Коутиньо, кимдир Дембеле ва Гризманн ҳақида гапирмоқда. Менинг исмимни ҳам бу рўйхатда санаб ўтишди. Аммо буларнинг бари шунчаки миш-миш эканлигини биламан. Менинг яқинларим барча хабарларни диққат билан кузатиб боришмоқда ва кейинчалик бу борада менга мурожаат қилишмоқда. Уларга бу хабарлар қандай қилиб тарқатилганини тушунтириш қийин.

“Ювентус” ҳам “Барселона” даражасидаги ажойиб клуб. Менинг шартномамда трансфер нархим ёзилмаган. Буни фақат клубни ўзи ҳал қилади”, дейди Дибала.