Дербида тўпурарлар қатнашмайди

Ортда қолган 18 баҳснинг 9 тасида “Олмалиқ”, 8 тасида эса “Металлург”нинг қўли баланд келган. Фақат битта ўйинда дуранг натижа қайд этилган. Тўплар нисбати “Олмалиқ” фойдасига 38-36.  “Олмалиқ”нинг “Металлург” устидан қозонган энг йирик ғалабаси – 4:1. “Металлург”нинг “Олмалиқ” устидан қозонган энг йирик ғалабаси эса – 4:2 ни ташкил этади.

Ўтган йил жамоалар ўз майдонларидаги ғалабали серияларини давом эттиришган. Олмалиқдаги ўйинда Дониёр Исмоилов ва Фаҳод Тожиевлар меҳмонларни ранжитишган – 2:0. Бекободдаги баҳс эса голларга бой бўлган. Зоҳид Абдуллаев (2та), Жаҳонгир Абдумўминов ва Эргаш Исмоиловлар томонидан урилган голларга Тимур Усмонов ҳамда Мўйдин Мамазулимовлар жавоб беришганди – 4:2. Қизиғи шундаки, Дониёр Исмоилов ҳамда Тимур Усмоновлар бу йилдан “Металлург” таркибида тўп сурмоқда.

Яна бир маълумот. Мазкур жамоаларнинг ўзаро учрашувларидаги тўпурарлар Мўйдин Мамазулумов ҳамда Зоҳид Абдуллаевлар ҳисобланишади. Ҳар иккаласи 7 мартадан гол киритишган. Бироқ бу йилги дастлабки тўқнашувда бу натижа ўзгаришсиз қолади. Гап шундаки, Мамазулумов “Олмалиқ”ни тарк этган бўлса, Абдуллаев дисквалификация боис Олмалиққа келмайди.

"Металлург" матбуот хизмати