Денис Коростиченко: "Рақиб жамоа ишқибозлари сизга қарсак чалиши жуда ёқимли"
22 апр 2023 20:53
Новости

Денис Коростиченко: "Рақиб жамоа ишқибозлари сизга қарсак чалиши жуда ёқимли"

Теги : "Қўқон-1912" "Локомотив"Денис Коростиченко

Про лиганинг 5-турида Қўқонда қозонилган иродали ғалабадан сўнг "Локомотив" устози Денис Коростиченко матбуот анжуманида иштирок этди.

Денис Коростиченко: "Йигитлар ва клубимизни ғалаба билан табриклайман. Қўқонга келган мухлисларга миннатдорчилик билдираман. Бир киши кам бўлсак ҳам ғалаба қозондик, бу йигитлар борини бериб ўйнаганини билдиради. Уларга раҳмат. Мураббийлар штаби ва шахсан Мирко Йеличичга миннатдорчилик билдираман, бу унинг ғалабаси.

Биринчи бўлимда ўйинимиз бироз ўзшамади, кейинроқ таҳлил қиламиз. Иккинчи бўлимда камчилик бўлиб қолдик ва мағлубиятга учраётгандик. Олдинга боришдан бошқа чорамиз йўқ эди. Голлар урдик ва ғалабага эришдик. Қўқонлик мухлисларга ҳам раҳмат айтмоқчиман, рақиб жамоа ишқибозлари сизга қарсак чалиши жуда ёқимли. "Қўқон-1912"да Тимур Кападзе билан ярим йил ишлаганман, клуб ҳали ҳам қалбимда.

- "Локомотив" сўнгги 2 йил давомида Қўқонда ғалаба қозона олмаётганди. Бу лаънат деб ўйлайсизми?

- Ҳа, ҳар доим Қўқон жамоасига қарши ўйинлар қийин ўтган. Ниҳоят бу серияни тўхтатдик. Ғалабали юришимиз давом этади деб ўйлайман.

- "Локомотив" олган қизил карточка жамоага қўшимча мотивация бердими?

- Ҳа. Танаффусда йигитларга мурожаат қилиб, биринчи бўлимдагидан икки баравар кучлироқ ишлаш кераклигини тушунтирдик. Йигитлар ҳақиқатдан ҳам мотивация олишди.

- Ўтган мавсум "Локомотив" "Турон" билан Суперлигада қолиш учун жуда ёмон ўйин кўрсатганди, бугун жамоа анча яхши ҳаракат қилди...

- "Турон"га қарши баҳсда аламли мағлубиятга учрадик. Ўшанда Суперлига тугаб, 2 ҳафта рақиб топа олмаганмиз. "Турон" эса формада бўлган. Буни баҳона қилиб кўрсатмоқчи эмасман. Про лигага тушганимиздан сўнг баъзи футболчилар жамоамизни тарк этишди, бошқа футболчилар келишди. Мавсум энди старт олди ва йигитлар ҳали ўз сўзини айтишади.