"Даврон Файзиев туфайли ҳимоячи бўлганман". "Жиззахлик Серхио Рамос" билан суҳбат

Мухлислар таъбири билан айтганда "жиззахлик Серхио Рамос" билан турли мавзуларда суҳбатлашдик.

- Футболга кириб келишингиз ҳақида...
- Футболга кириб келишимни қисқача айтаман. Болаликдан ушбу спортга меҳр-муҳаббат уйғонганди. 10 ёшимдан бошлаб футбол билан шуғуллана бошлаганман. Биринчи мураббийим Усмон Муҳаммедшин бўлган.

- Амакингиз, ҳозирги кунда "Қўқон-1912" жамоасида мураббийлар штабида фаолиятини олиб бораяётган Даврон Файзиев ҳам футболчилик вақтида ҳимоячи бўлган эди. Сиз ҳам айнан амакингиз ортидан ҳимоячи бўлишга аҳд қилганмисиз ёки бошқа ампулада ўйнай олмаганингиз сабаб шу жойдамисиз?
- Амаким Даврон Файзиев ва отам Диёр Файзиев ҳам ҳимоячи бўлишган. Мен ҳам шу сабаб ҳимоячи бўлишни маъқул кўрганман.

- Сиз "Сўғдиёна" жамоасида анчадан бери ўйнамоқдасиз. Интервьюларингизнинг бирида жамоадан кетмайман дегансиз ҳам. Айтингчи, бирор бир топ жамоадан ёки Европадан таклиф тушса қанақа жавоб берардингиз бу таклифларга?
- "Сўғдиёна" жамоаси Жиззах вилоятининг бош жамоаси эканлигини биламиз. Ҳар бир инсон қай соҳада бўлмасин вилояти шаънини ҳимоя қилгиси келади. Тўғри, жамоадан кетмаслигим ҳақида айтганман. Аввалроқ ҳам бир қанча яхши таклифлар тушди, аммо мен жамоада қолишни афзал кўрдим. Эртага нима бўлишини Худо билади. Балки яхшироқ таклифлар тушса кўриб чиқарман.

- Сиз нафақат ҳимоя қўрғонида балки ҳужум чизиғида ҳам фаоллик кўрсатишга ҳаракат қиласиз ва бу орқали голлар ҳам киритасиз. Жиззахлик мухлислар таъбири билан айтганда "Сўғдиёна"нинг "Рамос"исиз. Бу ҳақида фикрингиз?
- Бу жуда ҳам ёқимли ҳолат албатта. Мухлислар ишончини оқлаганимдан хурсандман. Бу менга янада қўшимча куч беради.

- Бу йилги мавсумда "Сўғдиёна"нинг биринчи голи муаллифисиз. Бу ёқимли ҳолат, шундай эмасми? АГМКга қарши кечган оғир баҳсда ўз жойингиздан олдинга бориб гол уришингиз бу ҳужумчилар ишидан қониқиш ҳосил қилмаганингиз сабабдир?
- Гол уриш ҳамиша ёқимли ҳолат бўлган. Ҳақиқатан ҳам ўша ўйин оғир бўлди. Ғалаба қозонишга ҳаракат қилдик. Аммо бу футбол. Футболда эса ҳамма нарса бўлиши мумкин.

- Даврон Файзиев, Александр Мочинов, Сергей Лушчан, Улуғбек Бақоев. Шу тўрт мураббий қўлида ҳам футбол ўйнадингиз. Улардан нималарни ўргандингиз?
- Ҳар бир мураббий ўзига хос тажрибага эга. Сиз айтган мураббийлардан кўп нарса ўргандим десам хато бўлмайди. Улар билан ишлаганимдан хурсандман!

- Футболчилик фаолиятини тугатгач мураббийликка қадам қўйиш нияти борми?
- Очиғи ҳозирдан бир нарса дейиш қийин. Буни вақт кўрсатади.

- Карантин даври қандай ўтмоқда? Футболсиз зерикарли ростан ҳам, шундай эмасми? Ўз формангизни йўқотиб қўйишдан қўрқмаяпсизми?
- Футболсиз зерикарли чиндан ҳам. Ўзим ҳамма қатори карантин қоидаларига риоя қиляпман. Уйда индивидуал тарзда ҳам шуғулланмоқдаман. Иложи борича спорт формани йўқотмасликка ҳаракат қиляпмиз.

Оғабек Самисов суҳбатлашди