Даврон Файзиев: “Олдимизга кейинги босқичга чиқиш вазифаси қўйилганди”

Дастлабки учрашувда ҳам жиззахликлар 1:0 ҳисобида муваффақият қозонганди. Шу боис Даврон Файзиев жамоаси чорак финалга йўл олди. Учрашувдан сўнг “Сўғдиёна” устози ўз фикрлари билан ўртоқлашди.

- Ўйинга яхши тайёргарлик кўргандик. Чунки биринчи учрашувда биз кейинги босқичга чиқиш масаласини ўз майдонимизда хал этишга яқин эдик. Аммо 1:0 ҳисобида ғалаба қозонгандик. Жавоб учрашувги ҳам пухта ҳозирлик кўрилганди. Бугун ўзинглар ҳам кўрдинглар, майдонда жиддий кураш кечди. “Қўқон-1912” яхши шаклланган жамоа. Таркибида махоратли ўйинчилар талайгина. Бу жамоанинг олдинги ўтказган 3-4та баҳсларини дискини кўриб чиққандим ва шунга монанд тактика ишлаб чиқдик. Бугун омад биз томонда бўлди – дея гап бошлади Даврон Орипович. 

- Олдимизга вазифа қилиб кейинги босқичга чиқиш масаласи қўйилганди. Бугун уни сафарда амалладик. Бундан хурсандмиз. Энди қўқонликлар билан чемпионат доирасида 26 июнь куни яна ўйнаймиз. Бўлажак баҳс ҳам оғир кечишини ҳозирдан айтиш мумкин. Чунки уч маротаба кетма-кет бир жамоа билан ўйнаш жуда оғир. Энди уйдаги ўйинга янада жиддий тайёрланишга харакат қиламиз. Биз учун яхши кунлар яқинлашмоқда деган бўлардим. Хушхабарни эшитган бўлсангиз, “Қўқон-1912” билан ўйинни Жиззахдаги янги стадионда ўтказамиз. Буни жуда интиқлик билан кутаётгандик. Янги стадиондаги илк учрашувда мухлисларимизни ғалаба билан хурсанд қилишга уринамиз. 

- Асосий вазифамиз бу йил олий лигада жамоани ўз ўрнини топишида хизмат қилиш. Бунинг учун ҳали олдинда яна кўп ишлашимиз керак. Энг аввало барқарорликка эришиш учун жамоада тартиб-интизом биринчи навбатда бўлиши керак. Шундагина мақсадга эришиш мумкин. 

- Кубокнинг чорак финалида энди “Бунёдкор” ва “Обод” жуфтлиги ғолиби билан ўйнаймиз. Ундан олдин чемпионат доирасида иккита муҳим учрашув кутиб турибди. Ҳар бир ўйинга жиддий қараймиз ва муваффақиятли иштирок этиш учун курашамиз – дейди Файзиев.