Coca Cola Суперлигаси. 16-тур лауреатлари

Сайтимиз ўз анънасига содиқ қолган ҳолда тур лауреатларини аниқлади. 

"Андижон" дарвозабони Элдор Адҳамов якунланган турда "Навбаҳор" билан сафардаги баҳсда ажойиб ўйнади. "Лочинлар"нинг кўплаб ҳужумлари ва зарбаларидан кейин Адҳамов жамоасини голлардан қутқариб қолди ва ҳақли равишда championat.asia талқинига кўра 16-турнинг энг яхши дарвозабони деб топилди.

"Сўғдиёна" ярим ҳимоячиси Искандар Шойқулов "Қўқон-1912" билан баҳсда ажойиб гол уришга муваффақ бўлди. Майдон марказида тўпни эгаллаб олган футболчи жарима майдони яқинига бориб дарвозанинг юқори бурчагига гол урди. Шу тариқа Искандар Шойқуловнинг голи Championat.asia талқинига кўра турнинг энг чиройли голи деб топилди.

Турнинг марказий учрашувида АГМК "Бунёдкор"ни мағлуб эта олди. Олмалиқликлар устози Миржалол Қосимов Вадим Абрамов бошчилигидаги жамоадан устун келиб, бир кун бой бериб қўйган иккинчи ўринига қайтди. Захирадан майдонга тушган Жасур Умаров учрашувдаги ғалаба тўпини уришга муваффақ бўлди. Шу боис Championat.asia талқинига кўра Миржалол Қосимов 16-турнинг энг яхши мураббийи деб топилди.

Марказий баҳсда АГМК сафида грузиялик Элгужа Григалашвили жуда фаол бўлди. Унинг тўп узатишидан кейин унинг ҳамюрти Мате Ватсадзе гол урди. Иккинчи таймда эса рақиб дарвозабонинг хатосидан унумли фойдаланиб чиройли гол урди. Championat.asia талқинига кўра Элгужа Григалашвили 16-турнинг энг яхши футболчиси деб топилди.