Черан, Юсупов, Ҳасанов. Суперлиганинг бу йилги "капитан"лари кимлар?

ПФЛ ҳам тайёр, ҳакамлар эълон қилинган. Лекин қизиқ томони бу йил жамоаларни қайси футболчилар майдонга сардор сифатида бошлаб тушади? Етакчи ролида кимларни кўрамиз? Қуйида батафсил. 

"Пахтакор" - Драган Черан 

Драган Черан аллақачон "Пахтакор"нинг алмаштириб бўлмас муҳим фигурасига айланиб бўлган. Бу йил "шерлар"ни айнан у сардорлик боғичи остида майдонга бошлаб тушади. Майдон марказида фаолликни қўлдан бой бермайдиган, ностандарт қарорларга эга Черан учун бу Ўзбекистондаги саккизинчи мавсум ҳисобланади. 

"Навбаҳор" - Ўткир Юсупов 

Ўткир Юсупов нафақат "Навбаҳор"нинг, балки Катанец келгач миллий терма жамоамизнинг ҳам биринчи рақамли посбони сифатида гавдаланмоқда. Маҳоратли кипер ўтган мавсумда ҳам жамоасининг сардори бўлганини айтиб ўтиш жоиз. 

"Насаф" - Умар Эшмуродов 

"Аждарлар" таркибидаги энг тажрибали футболчилардан бири Умар Эшмуродов эканлигини биласиз. Ҳимоячи бир неча йилдан бери мунтазам равишда "Насаф"нинг сардори сифатида ҳаракат қилиб келмоқда. У бу мавсумда ҳам ўз вазифасини бажаришда давом эттиради. 

АГМК - Санжар Турсунов/Анзур Исмоилов 

АГМК жамоасида етакчи мақомидаги тажрибали ижрочилар бир неча нафарни ташкил қилади. Сардор сифатида аввалги мавсумларда жамоада Санжар Турсунов тўп тепди. Лекин ҳозирда Санжар Турсунов жароҳат сабаб сафга қайтгунига қадар унинг ўрнини Анзур Исмоилов билинтирмасликка ҳаракат қилади. Ҳар ҳолда қишки йиғинларда ташкил қилинган ўртоқлик учрашувларида у сардор сифатида бошлаб тушди. 

"Қизилқум" - Шерали Жўраев 

Навоийликлар таркиби ҳар йили янгича кўриниш олади. Бу йил нисбатан ёшартирилди, катта номлардан воз кечилди. Бу йил "Қизилқум"ни жамоада тажрибали футболчи Шерали Жўраев сардор. Унинг тажрибаси олдиндаги мавсумда қўл келиши турган гап. 

"Сўғдиёна" - Жасур Ҳасанов

Бугунги кунда Суперлиганинг энг ёши катта ўйинчиси, шунга қарамай яхши спорт формасида кўпчиликка ўрнак бўлаётган Жасур Ҳасановнинг "Сўғдиёна"нинг сардори бўлишини тахмин қилиш қийин эмас. У ўтган йиллар давомида ҳам жиззахликларнинг етакчиси бўлиб келди ва бу мавсумда ҳам уни шу ролда кўрамиз. 

"Олимпик" - Беҳзод Шамсиев 

"Олимпик" ташкил қилингандан ва ундан аввал терма жамоа миқёсида ҳам Беҳзод Шамсиев сардорлик масъулиятини ўз зиммасига олган. Жароҳат сабаб орада маълум вақт расмий ўйинларни ўтказиб юборган футболчи ўтган мавсумда яна ўз спорт формасини тиклаб олди. 

(давоми бор)