“Championat.asia”да эшик барчага очиқ!

Сўнги пайтларда сайтимизда шоу-бизнес вакилларининг чиқиши урф бўлди. Лекин аҳамият берсангиз, уларнинг барчаси рейтинг учун эмас, Ватан жамоасига бефарқ эмаслигини, танқид билан бир қаторда футболчиларга ишонишларини айтиб ўтишяпти.

Афсуски, бизда барча мутахассислар ҳам минбарга чиқишни исташмайди. Футболчиларни айтмаса ҳам бўлади. Журналистиканинг олдидаги асосий муаммо ҳам аслида шунда. Жуда кўпчилик мураббий ва футболчилар билан гаплашамиз, интервью тугагач, ёзмай қўя қолинг, эртага муаммо бўлмасин менга дейишади.

Олий лига ўйинлари, МТЖ машғулотлари ва бошқалар барчаси бир хилдек... Мухлисларга янгилик керак. Шунинг учун сентябрь ойигача янгиликларни шу тарзда бериб боришга қарор қилдик. Қолаверса, Ўзбекистон сўз эркинлигига амал қиладиган давлат. Ҳақорат бўлмаган ва теран фикрловчи барча учун “CA”нинг эшиги очиқ. Марҳамат, бўлаётган танқидларга ёки таклифларга иккинчи томон келиб ўз фикрини берсин. Бизнинг мақсад аниқ бир киши ёки ташкилотни танқид қилиш ёки уни ерга уриш эмас. Қарс икки қўлдан чиқади. Шунчаки? баъзида иккинчи томоннинг фикри кўринмаётгани бизнинг айбимиз эмас.

Сайтниyu имкон қадар қизиқроқ кўриниш олиши учун “Стадиондан селфи”, “Легионер мухлис”, “Пенальти”, “Кўчадаги камера” каби лойиҳаларни амалга ошириб келаяпмиз. Яна бир қанча лойиҳалар мавжуд, йўқ эмас. Аммо? улар кичик бўлмаган маблағни талаб этади. Бугунги кунда интернет журналистикасида реклама даромади катта эмас. Шунинг учун имкониятимиздан келиб чиққан ҳолда сизлар биланмиз!

Ўзбекистон Республикаси Президенти Шавкат Мирзиёевни ОАВга очаётган кенг йўли натижасида турли соҳалардаги муаммолар ҳам ечила бошлади. Бизнинг мақсадимиз ҳам спорт соҳасидаги муаммоларни бартараф этишда ўз улушимизни қўшиш.

Айни пайтда барча қатори биз ҳам терма жамоамизнинг жаҳон чемпионатига чиқишини истаймиз. Мураббийга тескари бўлган кўпчилик ҳам бугунда терма жамоани мундиалда футболчилар учун кўришмоқчи. Шунинг учун ҳам биз уларни қўллаб-қувватлаймиз. Ўзбекистон мухлислар клуби, “Go Uzbekistan” лойиҳаси муаллифлари билан ўйинга яқин бир қанча лойиҳаларни амалга оширишни мақсад қилганмиз.

Сизлардан ҳам терма жамоамиз ФУТБОЛЧИЛАРИНИ қўллаб-қувватлаб қолишни ва фикрлар бўлимида одоб-ахлоқ нормаларига амал қилишларингизни сўраб қолган бўлардик. Тез кунда фикр қолдира олмаётган аксар ўқувчилар учун яхши хабарни эълон қиламиз!

Бугунги кунда футбол ОАВда фаолият олиб бораётганлардан Хайрулла Холиқов ва Диёр Имомхўжаев каби журналистларнинг “CA”даги чиқиши кўпайиб қолди. Бу ҳам эшикнинг барча учун очиқлигидан далолат. Афсуски, соҳамдаги йўналишни бироз ўзгартирганим учун ўзимда мақола ёзиш учун деярли вақт бўлмаяпти. Яқинда Рауф Инилеев “Бутун фаолиятимни олиб айтадиган бўлсам, спорт интернатида ишлаган йилларимни жуда соғинаман”, деб ўтди. Мен учун ҳам “CA”ни шакллантиришга кетган вақтимни, ўз фаолиятимдаги энг яхши йиллардан бири бўлган деб иккиланмай айтаман. Барчангизни ҳурмат қилган ҳолда Сизларга оилавий тотувлик тилайман!

Нодирхўжа Юлдашев