“Цементчи” йиғинни бошлади. Таркибда ўзгаришлар юз бермоқда

Клуб матбуот хизматининг хабар беришича, жамоа кеча Қувасойдаги қароргоҳида йиғилган. Мураббийлар штабининг режасига кўра, ҳозирча футболчилар кунига бир маҳалдан шуғулланмоқда. Таркибдаги ўзгаришларга келадиган бўлсак, ўтган мавсум “Цементчи” шарафини ҳимоя қилган Жаҳонгир Дадабоев ҳуқуқий жиҳатдан “Нефтчи” ўйинчиси саналади. Унинг ижара муддати ниҳоясига етгач, “Цементчи”га қайтмаган. Марказий ярим ҳимоячи Нодирхон Камолов куни-кеча “Олмалиқ” йиғинига бориб қўшилди. Азизхон Ибрагимов эса “Қўқон-1912” машғулотларида иштирок этмоқда. Ўтган мавсум жамоанинг тўпурари бўлган Элёр Акбаров ҳам олий лига клуби бўлмиш – “Сўғдиёна”да кўрикдан ўтаётганини айтиш лозим. Шунингдек Асрор Тилаволдиев, Иброҳим Нўъмонов ҳамда Абдуллажон Мирзаев каби футболчилар билан ҳам клуб хайрлашишга қарор қилган.

Йиғинга келиб қўшилган янги футболчилар ҳам йўқ эмас. “Орол”нинг етакчилари бўлиб келаётган Ербол Сейтназаров билан Нурлибек Таласбоев айни дамда қувасойликларнинг машғулотларида иштирок этмоқда. “Косонсой”дан эса Сардор Сотволдиев таркибга келиб қўшилган. Ўтган мавсум “Ёзёвон-Лочинлари” сафида ҳаракат қилган Владлен Норов ҳам бугунги кунда “Цементчи” йиғинида қатнашаётганини таъкидлаш жоиздир.

Мураббийларнинг режасига кўра, биринчи босқич йиғинида синов-назорат учрашувларини ҳам ўтказиш кўзда тутилган. Хусусан 13 январь куни Фарғонада “Нефтчи” ёшлар жамоасига қарши майдонга чиқилса, 16 январда Андижонда “УзДонгЖу” билан куч синашадиган бўлиб турибди.