“Бунёдкор-W“ ҳужумчиси: Меган Рапинога ҳавас қиламан

"Бунёдкор-W" ОЧЛда қатнашишини биласизми?

- Футболчи бўлишингизга қаршиликлар бўлганми? 

- 2012-йилда футболга кириб келганман. Мактабда ўғил болалар билан футбол ўйнаб юрардим. Ўша пайтлар Думаева Нодира опа “СЎҒДИЁНА“ аёллар клубига таклиф қилдилар ва мен дарсдан кейин футболга қатнаша бошладим. Уйга кеч келганим сабаб ойим қаршилик қилганлар. Бу 2015 йил профессионал футболга киргунимга қадар давом этган. Шу йили “Локомотив-W“ жамоасига таклиф қилиндим ва аёллар жамоасида профессионал футбол билан фаолиятимни давом эттирдим. 2017 йил “Қизилқум-W“, 2018 йил “Навбаҳор-W“, 2019 йил “Сўғдиёна-W“, 2021 йил “Металлург-W“ жамоаларида ҳам ўзимни синаб кўрдим ва ҳозирда “Бунёдкор-W“ клуби аъзосиман.

- Футболни танлаганингизга ҳеч афсусланганмисиз?

- Йўқ, сира афсус қилмайман. Ўз касбим билан фахрланаман.

- Суперлигада ҳакамлар мавзуси трендда бўлиб турибди. Аёллар футболидаги рефериларнинг даражасига қандай баҳо берасиз?

- Ҳар ким ўз касбини ўзи яхши билади. Ўйлашимча, ҳар ким ўзи севган касбига виждони билан ёндашса, натижа ҳам шунга яраша бўлади.

- Кучли чемпионатларда ўйнай оладиган ҳамюртларимиз сафига кимларни қўша оласиз?

- Людмила Карачик, Қудратова Нилуфар, Зоирова Умида, Галимова Саида, Шойимова Мафтуна, Тилолова Лайло, Хабибуллаева Диёра.

- Қисқа муддат ичида икки бор жамоа алмаштирдингиз. Бунинг сабаби нима?

- “Сўғдиёна-W“ жамоаси билан шартномам якунланганлиги учун хайрлашдим. “Металлург-W“ жамоасидан ўзимни кучлилар билан синаб кўриш учун имконият беришларини сўрадим. Улар менга бу имкониятни беришди. Албатта, бунинг учун “Металлург-W“ клубига раҳмат.

- Агар танлаш имкониятингиз бўлганда қайси жамоада тўп сурардингиз?

- Мен аёллар футболига кириб келганимдан буён “Бунёдкор-W“ жамоасида тўп суришни ният қилар эдим ва шу ердаман.

- Жаҳонда аёллар футболини кузатасизми? Кумирингиз ким?

- Албатта, "Реал Мадрид" "Барселона", "Арсенал" жамоаларини мунтазам равишда кузатиб бораман. Кумирим - Меган Рапино ("ОЛ Рейн").

- Энг катта орзунгиз нима?

- Орзуларим жуда кўп. Улардан биттаси Севара Назархон билан кўришиш.

- Эртага Иорданияга учиб кетасизлар. Тайёргарлик қандай кетяпти? 

- 21-турдан сўнг жамоамиз  билан яна машғултларга қайтдик. Иорданияда бўлиб ўтадиган Чемпионлар Лигасига тайёргарлик аъло даражада давом этмоқда. Ватанимиз байроғини кўкларга кўтариб, "Бунёдкор" мухлисларига ажойиб ғалаба тақдим қиламиз. 

М. Кушбакова суҳбатлашди