"Бунёдкор" раҳбарияти Анвар Ғофуровга ишонч билдиришга қарор қилди, аммо...

3-турда "Навбаҳор"га қарши баҳсга "қалдирғочлар"ни ёш мураббий Анвар Ғофуров тайёрлади. "Бунёдкор" бу мураббий қўл остида чемпионликка асосий даъвогар ҳисобланган "Навбаҳор"га қарши ўйинда яхши ўйин намойиш эта олди ва 2:2 ҳисобида дуранг қайд этди.

Бундан ташқари ФИФА кунлари вақтида "қалдирғочлар" Москвада ЦСКАга қарши халқаро ўртоқлик учрашувини ўтказиб қайтишди. "Бунёдкор" "армиячилар"га қарши ўйинда ҳам муносиб ҳаракат қилди. Шу боис клуб раҳбарияти ёш мутахассисга ишонч билдиришга қарор қилди.

Анвар Ғофуров қўрқмасдан академиядан чиққан ёшларга имконият бермоқда ва жамоани янги ғалабалар сари етакламоқда.

Бироқ Анвар Ғофуровда ПРО лицензияси йўқлиги боис бир неча йилдан буён "Бунёдкор" академиясида ишлаб келаётган тажрибали Сергей Ильясович Арсланов расман бош мураббий бўлади. У ўтган йил "Сурхон"да ишлаган Сергей Сергеевич Арслановнинг отаси.