Бунақаси бўлмаган! 3 дақиқада 20 мингта чиптага буюртма келиб тушди

Шу куни "Ал Иттиҳод" мезбон сифатида ҳамшаҳари "Ал Аҳли"ни қабул қилади. Маълумки, ҳар икки жамоа уй учрашувларини битта стадионда ўтказади. Саудия Арабистони Про лигаси 10-туридан ўрин олган мазкур баҳсга қизиқиш ҳозирдан катта.

Ишонасизми, чипталар ҳали сотувга чиқарилмасдан қандайдир уч дақиқа ичида 20 мингта чиптага буюртма келиб тушди. Бунақаси Осиё футболида камдан кам кузатилади. Тасаввур қилинг-а, 3 дақиқа ичида 20 мингта чиптага олдиндан буюртма!

Энди Жидда шаҳрида бўлиб ўтадиган ўйин танаффус пайтида лотерея ўйналадими-йўқми, буни билмаймиз. Агар каттароқ бирорта соврин қўйилганида бир киши шунча билетни сотиб олибди деб тахмин қилса бўларди. Лекин сир эмас, Саудияда мухлислар шундоқ ҳам футболга қизиқади ва буюртма минглаб фанатлар томонидан берилганини тахмин қилиш қийин эмас.

Турнир жадвалида "Ал Иттиҳод" 9та ўйиндан сўнг ҳали бирорта ғалабага эришмай, 2 очко тўплаган ҳолда охирги ўринни эгаллаб турибди. "Ал Аҳли" эса 19 очко билан 3-ўринда боряпти. Ҳозирча жадвал пешқадами "Ал Ҳилол" - 9та ўйин, 9 ғалаба, 27 очко.

25 ноябрь куни бўлиб ўтадиган Жидда дербиси бизнинг вақт билан 21:40да старт олади.