Бугун таваллуд айёмини нишонлаётган Бразилия афсонаси ҳақида

Икки карра жаҳон (1994, 2002), икки карра Америка (1997, 1999), икки карра Италия (2001, 2004) чемпиони ва икки бор Либертадорес кубоги (1992, 1993) соҳиби, Европа чемпионлар лигаси (2007) ғолиби бугун таваллуд кунини нишонламоқда.

Бўлажак жаҳон юлдузи 1970 йил Сан-Паулуда таваллуд топган. Болалигидан футболчи бўлишни орзу қилган Кафуни 18 ёшига қадар бирорта ҳам клуб қабул қилмаган.

1988 йилда "Сан-Паулу" жамоаси таркибига қабул қилинган Кафу учун юксак марралар томон барча йўллар очилди. "Сан-Паулу", "Реал Сарагоса", "Палмейрас", "Рома" ва "Милан" клубларидаги 19 йиллик фаолияти давомида жаҳоннинг энг кучли ўнг қанот ҳимоячисига айланди. 2007 йилда Европа чемпионлар лигаси ғолибига айланган Кафу 2009 йилда бутсаларини михга илди.

1994 йилдан бошлаб тўрт мундиалда Бразилия шарафини ҳимоя қилди. 2002 йилги мусобақада терма жамоа сардори сифатида чемпионликни тантана қилди. У терма жамоа шарафини 16 йил мобайнида 142та учрашувда ҳимоя қилди. Футбол афсонаси бугун 49 ёшга тўлди.

Фахриддин Рўзиев тайёрлади