"Бугун оддий жамоалар ўйнамайди. Черан ва Станоевич катта саҳнага чиқиши мумкин" Суперкубок олдидан мутахассислар фикри

Унда мамлакатнинг амалдаги чемпиони "Пахтакор" ва кубок соҳиби "Насаф" тўқнаш келади. Мазкур баҳс олдидан  Ўзбекистон футболчилар уюшмаси раҳбари, собиқ футболчи Камолиддин Мурзоев ва мураббий Азамат Абдураимовнинг фикрларини тингладик.

Камолиддин Мурзоев - Мавсумнинг биринчи ўйини бўлгани учун жамоалардан ёрқин ўйин кутиш бироз нотўғри бўлади. Ўртоқлик ва расмий ўйинларнинг шукуҳи бошқача. Фикримча, жамоалар бир-бирларига эҳтиёткорлик билан ёндошишади. 

Бугун "Пахтакор"да Черан кўп нарсани ҳал қилиши мумкин. Яъни катта саҳнага чиқади.  "Насаф"да эса барибир жамоавий ўйин шаклланган. Яққол бирор бир футболчини кўрсатиш қийин бўлсада, Марко Станоевич  "Пахтакор"га бош оғриқ бўла олади. Бу финаллигини унутмаслигимиз лозим. Имкониятлар 50/50. 

Албатта Ойбек Бозоров катта йўқотиш. Бироқ Рўзиқул Бердиев бундай паллада қандай йўл тутишни биладиган мураббий. Бозоров билан жамоа янада кучаярди. Айтганимдек, жамоавий ўйин борлиги учун у қадар катта йўқотиш ҳисобланмаса керак.

Азамат Абдураимов  - Ўзбекистон  Суперкубоги катта футболни соғинганлар учун ҳақиқий байрам ҳисобланади. Мамлакатимизда футбол баҳори нафаси кезиб юрибди. Шу боис ўзим ҳам бу беллашувни интиқлик билан кутмоқдаман. Бугун оддий жамоалар эмас, Ўзбекистоннинг охирги йиллардаги энг яхши клублари тўқнашади. Тўғри  "Насаф"да молиявий муаммолар кузатилаётганига қарамай мавсумни соврин билан тугатмоқда. Мутахассис сифатида Суперкубогдан сифатли  ўйин кутяпман. 

Жамоаларнинг имкониятини тенг баҳолаган бўлардим.  "Насаф" ўтган йили бу жамоага қарши нималарга қодирлигини кўрсатди. "Пахтакор"да янги мураббийлар штаби иш бошлади. Славче Войнескининг қандай услуб ва фалсафага эгалигини билмаймиз. Шундай экан кўпчилик учун бу қизиқ туюлади.

Мавсум боши. Бундай ҳолатда жамоаларнинг қандай тайёргарлик билан етиб келгани асосий ўринга чиқади, деб ўйлайман. Тактик ишланмаларни йўлга қўйиш учун вақт зарур. Ишонч билан айтаманки, футболчилар катта иштиёқ билан ҳаракат қилишади.