Бугун катта футбол! "Металлург" - "Локомотив"

Олий лига, 14-тур. 25 июнь
МЕТАЛЛУРГ - ЛОКОМОТИВ

Бош ҳакам: Шерзод Қосимов
Бошланиш вақти - 18:00

Жадвалдаги ўрни: "Металлург" 3-ўринда (27 очко), "Локомотив" 1-ўринда (34 очко).
Очколар орасидаги фарқ - 7 очко.

ТАЪРИФ: Бу ўйинга бемалол ўз майдонида ва сафарда ютқазмай келаётган жамоаларнинг ўзаро тўқнашуви дея оламиз. Негаки, бу йилги олий лига бошланганидан бери "Металлург" ўз майдонида умуман мағлуб бўлмади. "Локомотив" эса сафарда ютқазгани йўқ. Бундан кўриниб турибдики, ҳар иккала жамоа ҳам мавсумни юқори нотада ўтказяпти. "Металлург" ўтган турда ғалаба қозонгач, турнир жадвалида 3-ўринга кўтарилиб олди. Жамоаларни олий лига мусобақа жадвалида 7 очко ажратиб турибди.

ФАКТ: Ўз майдонида 7та учрашувда майдонга тушган "Металлург" шундан олтитасида ғалаба қозониб, бир бор дуранг ўйнади. Жамоа ўз майдонида "Бунёдкор" билан 1:1 ҳисобини қайд этган. Бекободдан мағлуб бўлиб қайтган жамоалар: "Сўғдиёна", "Шўртан", "Обод", "Қўқон-1912", "Насаф" ва "Андижон".

ФАКТ: "Локомотив" ҳам ҳозирча сафарда еттита ўйин ўтказиб, шундан олтитасида ғалаба қозонди ва бир марта дуранг ўйнади. "Локо" сафардаги беллашувларда "Навбаҳор", "Андижон", "Шўртан", "Обод", "Қўқон-1912" ҳамда "Насаф" клубларидан устун келди. "Локомотив" сафар учрашувларида энг кўп гол урган жамоа бўлиб турибди, "темирйўлчилар" ҳисобида 16та гол бор.