Бугун футбол. "Қўқон-1912" - АГМК

Турнир жадвалига назар ташлайдиган бўлсак, "Қўқон-1912" 18 очко тўплаган ҳолда 8-ўринни эгаллаб турибди. АГМК ҳисобида эса 14 очко бор ва бу жамоа 11-ўринга тушиб қолган. Охирги ўриндаги "Нефтчи" билан АГМКни 7 очко ажратиб турибди.

Ҳозирги пайтда иккала жамоанинг ҳам ишлари беш эмас. Хусусан қўқонликлар охирги бешта ўйиннинг фақат биттасида ғалабага эришиб, тўрт марта имкониятни бой беришди. АГМК эса охирги бешта ўйиндан тўрттасида мағлуб бўлган ҳолда бир марта дуранг ўйнади.

"Қўқон-1912" бунгача ўз майдонида 8та учрашувда майдонга тушиб, шундан фақат учтасида ғалабага эришди. Жамоа ўз майдонида "Навбаҳор", "Бунёдкор" ва "Металлург" клубларидан устун келган. Яна бир факт шуки, қўқонликлар уйда "Локомотив" ва "Қизилқум"га қарши имкониятни бой берган ўйиндан сўнг бош ҳакамлар четлатилган.

Бир қарашда АГМКда муаммо йўқдек. Лекин натижалар ҳа деганда ижобий бўлавермагач, клуб раҳбарияти россиялик мураббий Виктор Кумиковни ишдан бўшатди. Шундан сўнг жамоани Бахтиёр Ашурматов қабул қилиб олди ва ҳозирча олмалиқликлар бу мураббий қўл остида ғалаба қозонишгани йўқ.

Ашурматов бошчилигидаги жамоа Суперлигада уч бор майдонга тушиб, битта ўйинда дурангга эришди ва икки бор мағлуб бўлди. Умуман олганда, АГМК охирги марта 11-турда сафарда "Металлург" устидан зафар қучиб қайтган.

Биласизми? АГМК шу пайтгача мавсум бошидан бери фақат учта ўйинда ғалабага эришган. Жамоа сафарда "Нефтчи" ва "Металлург"ни мағлуб этиб қайтган бўлса, ўз майдонида "Локомотив"дан кичик ҳисобда устун келган.