Бугун футбол. "Қизилқум" - "Динамо"

17:00 - “Қизилқум” (Навоий) – “Динамо” (Самарқанд)

Ҳакамлар: Ҳ. Рўзиев (Тошкент), Т. Галеев (Тошкент), А. Пўлатов (Тошкент), Р. Лутфуллин (Тошкент)

Назоратчи: А. Абдуллаев (Тошкент)

ЎзПФЛ вакили: А. Фролов

Бу ўйин шуниси билан қизиқки, келаси йил олий лигада 12та жамоа қолади дейилганидан кейин кўп клублар қимирлаб қолишди. Айниқса, жадвалнинг қуйи ўринларида бораётганлар. Турнир жадвалида "Қизилқум" билан "Динамо" ёнма-ён ўринларни эгаллаб турибди. 

"Қизилқум"да 30 очко ва 11-ўрин, "Динамо"да эса 29 очко ва 12-ўрин. Шу боис ҳам ушбу беллашув ниҳоятда қизиқ кечиши кутиляпти. Имкониятлар борасида "Қизилқум"ни бироз устун дея оламиз. Ҳар ҳолда бу жамоа уйда ўйнайди. Лекин нима бўлишини вақт кўрсатади. 

Иккала жамоа ҳам иккинчи даврани кўнгилдагидек ўтказа олмаяпти. "Обод"га қарши техник ғалабаларни ҳисобга олмаганда ҳар иккала клуб шу пайтгача биттадан ўйинда ғалаба қозонди. "Қизилқум" ўз майдонида "Қўқон-1912"дан, "Динамо" эса "Олмалиқ"дан устун келган. 

Биласизми? "Қизилқум" охирги уч учрашувда мағлубиятга учради. Жамоа "Насаф", "Локомотив" ва "Нефтчи" клубларига имкониятни бой берди. Қизиғи шундаки, учала мағлубиятда ҳам 0:2 ҳисоби қайд этилган.

"Динамо" қаторасига 10та ўйинда гол ура олмаганди, аммо ҳартугул 24-турда "Олмалиқ"қа тўп киритиб, 1:0 ҳисобида ғалаба қозонишга муваффақ бўлди. Лекин жамоа шундан кейин "Насаф" майдонига сафар уюштириб, 0:3 ҳисобида ютқазиб қўйди. 

Факт: "Динамо" шу пайтгача сафарда уч марта ғалаба қозонган ва учала ғалабани ҳам биринчи даврада қўлга киритган. Жамоа сафарда "Металлург", "Пахтакор" ва "Нефтчи" клубларидан устун келган. 

Ўйинни ким бошқаради? Олий лигада қолиш учун курашадиган жамоаларнинг ўзаро баҳси Ҳасан Рўзиевга ишониб топширилди. Бу Рўзиевнинг Навоийга учинчи сафари бўлади. 

"Қизилқум" бунгача Ҳасан Рўзиев бошқарган икита ўйинда икки хил натижа қайд этган. Дарвоқе, ушбу ҳакам "Динамо" иштирокидаги иккита сафар учрашувида ҳакамлик қилган. "Динамо" битта мағлубият ва битта дуранг қайд этишдан ташқари иккала беллашувда ҳам гол ура олмаган.