Бугун футбол. "Насаф" - "Машъал"

“Насаф” (Қарши) – “Машъал” (Муборак)
Ҳакамлар: В. Коваленко (Тошкент), Н. Рўзимов (тошкент), С. Улфатов (Тошкент вил.), С. Абдураҳмонов (Тошкент)
Назоратчи: И. Шарипов (Бухоро)
ЎзПФЛ вакили: А. Иноятов

Жадвалдаги ўрни: "Насаф" 3-ўринда - 17 очко. "Машъал" 7-ўринда - 15 очко. Агар бугун муборакликлар зафар қучса, "Насаф"дан ўзиб кетишади.

Ўйиндан нима кутяпмиз? Авваллари "Насаф" ўз майдонида "Машъал" билан ўйнаганида устунлик кўпроқ қаршиликлар томонида бўларди. Бугунги баҳс олдидан ҳам шундай дея оламизми? Агар "Машъал" астойдил кураш олиб борадиган бўлса сафарда очко олиши мумкин. Лекин иккинчи томондан бу жамоа охирги сафар ўйинида "Сўғдиёна"га йирик 0:3 ҳисобида ютқазиб қўйди. Шундай экан, бугун нима бўлади, ҳайронмиз.

Факт: "Машъал" сафарда шу пайтгача фақат битта ўйинда ғалаба қозонган. Жамоа кичик воҳа дербисида "ШЎртан"ни 2:0 ҳисобида мағлуб этиб қайтди. Шундан сўнг муборакликлар икки ўйинда дуранг ўйнаб, бир бор мағлуб бўлган.

Биласизми? "Машъал" кетма-кет икки ўйиндан бери тўп кирита олмаяпти. Ва албатта гол урмаган ўйинларда ғалаба қозона олмади.

Факт: "Насаф" шу пайтгача уйдаги тўртта учрашувни ҳам ғалаба билан якунлади. Тўплар нисбати 9-1. Уйдаги ҳамма ўйинларда ғалаба қозонган яна бир жамоа бу - "Локомотив".

Биласизми? "Насаф" уйдаги беллашувларда "Бухоро", "Сўғдиёна", "Обод" ва "Нефтчи" клубларидан устун келган. Қизиғи, бу жамоа мана шу тўртта ўйиндан учтасида гол ўтказмасдан ғалаба қозонган.

Биласизми? "Насаф" кетма-кет тўрт турдан бери мағлуб бўлмаяпти. Қаршиликлар охирги марта 6-турда "Локо"га 1:2 ҳисобида имкониятни бой беришган.