Бугун футбол. "Бухоро" - "Сўғдиёна"

Турнир жадвалидаги ўрни: "Бухоро" 4-ўринда (52 очко), "Сўғдиёна" 10-ўринда (34 очко).

Очколар орасидаги фарқ: 18 очко.

Таъриф: Чемпионатни кучли учталикда ёки бўлмаса тўртинчи ўринда тугатишга ҳаракат қилаётган "Бухоро" бу турда "Сўғдиёна"га қарши баҳс олиб боради. Агар бугун бухороликлар зафар қучадиган бўлишса, ўзлари учун тўртинчи ўринни нақд қилиб қўйишади. Чунки кейинги икки турда "Бухоро" ютқазган, "Пахтакор" ғалаба қозонган тақдирда ҳам очколар орасидаги фарқ битта бўлиб қолади.

Мана шу боис ҳам "Бухоро" ўз майдонида ғалаба қозонишга ҳаракат қилиб кўради. "Сўғдиёна" эса катта эҳтимол билан Олий лигани юқори ўнталикда тугатади. Ҳар ҳолда жамоа ўнинчи ўриндан пастга тушмаса керак. Бугунги ўйинда жиззахликларни дуранг ҳам қониқтиради. Зеро, улар "Бухоро" ўз уйида қандай кучли футбол намойиш этишини жуда яхши билишади.

Факт: "Бухоро" жамоаси иккинчи даврада ўзида ўтказилган бешта учрашувдан тўрттасини ғалаба билан тугатди ва бир марта дуранг қайд этди. Таркиб жиҳатдан яхши шаклланган Жамшид Саидов шогирдлари уйда ҳар қайси рақибга етарлича бошоғриқ туғдира олишади. Жамоа ўз майдонида икки бор мағлуб бўлган: "Насаф" ва "Машъал"га қарши кечган баҳсларда.

Факт: "Сўғдиёна" эса асосан уй жамоаси ҳисобланади. Даврон Файзиев шогирдлари ҳозирча иккинчи даврада бешта баҳсни сафарда ўтказиб, шундан биттасида ғалаба қозонишди. Бир марта дуранг қайд этилган бўлса, учта ўйинда "Сўғдиёна" мағлуб бўлди.