Бугун биринчи лига бор. Эсдан чиқмасин-а!

Жудаям шиддатли курашларга бой учрашувлар бўлиши кутилмоқда. Эшитишимизча, аксарият ўйингоҳлардан биринчи лига муносабати билан европача футбол ҳавоси келиб турган экан. Буни бизга ўша стадион атрофида истиқомат қилаётган мухлислар етказишди. Дарвоқе, бугун саккизта ўйин бўлиб ўтади.

«Истиқлол» – «Аланга»
“Истиқлол”нинг мағлубиятсиз серияси бештага етди.
“Аланга” эса кетма-кет тўрт ўйиндан бери ғалаба нималигини билмаяпти.

«НБУ-Осиё» – «Шердор»
“НБУ-Осиё” охирги тўрт учрашувдан бери мағлубиятга учрагани йўқ.
“Шердор” эса мана уч ўйиндирки ғалаба қозона олмаяпти.

«Пахтакор-2» – «Регистон»
“Пахтакор-2” ниҳоят кетма-кет бешта ўйиндан иборат ғалабасиз сериясига ўтган турда якун ясади.
“Регистон” иккинчи босқич бошланганидан бери ҳозирча сафардаги бешта ўйиндан фақат биттасида ғалаба қозонган.
 
«Оқтепа» – «Зарафшон-ПФК»
“Оқтепа”нинг уйдаги ишлари чакки эмас, бешта учрашувдан тўрттасида ғалаба.
“Зарафшон” эса ҳали сафарда ғалаба нималигини билгани йўқ.
 
«Андижон» – «Машъал»
“Андижон” ўз уйида фақат ғалаба қозониб келмоқда.
“Машъал” эса сафарда ҳам ютяпти, ҳам ютқазяпти, керак бўлса дуранг ҳам ўйнаяпти.

«Қўқон-1912» – «Спартак»
“Қўқон-1912” охирги уч учрашувда уч хил натижа қайд этди: ютди, ютқазди, дуранг ўйнади. Шу ҳолат яна бошидан бошланадими?
“Спартак” кетма-кет уч ўйиндан бери фақат мағлубиятга учраб келяпти.
 
«Косонсой» – «Орол»
 “Косонсой” ўз майдонида “Орол”ни мағлуб этса керак. “Орол” учун натижадан кўра майдонга тушишнинг ўзиёқ катта бахт бўлиб қолди.
 
«Чуст-Пахтакор» – «Хоразм»
“Чуст-Пахтакор” уйда ютишга ўрганиб қолган жамоалардан. Улар ҳатто “Машъал”ни мағлуб этишди. “Хоразм” ўтган турда мағлуб бўлди, лекин жамоа ҳали кетма-кет икки марта ютқазгани йўқ.

Хайрулла ХОЛИҚОВ.