Бу кетишда Аргентина ЖЧ-2018ни юта олмайди

"Аргентинага қарши учрашув футбол тарихимиздаги энг яхши учрашувларимиздан бири бўлди. Шундай чиройли стадион бизга катта иштиёқ берди", - деди Хулен Лопетеги ўйиндан кейин.

У учрашувгача Лео Мессининг тиззасида жароҳати борлигини биларди, бироқ Испания каталониялик даҳо майдонга тушганида ҳам шундай ўйнаган бўларди. Балким Месси жароҳати билан ҳеч бўлмасам 45 дақиқа югуриб бера оларди, бироқ унинг жароҳати янада оғирлашарди. Хўш, кечаги ўйин орқали терманинг қайси футболчиси ЖЧда каромат кўрсата олишини исботлай олдими?

Бундай ҳолатда Сампаоли Лео Мессини ўрнини босадиган Пауло Дибалага мурожаат этиши керак эди. Албатта, кўпчилик мураббийлар Дибалани ўз таркибида кўришни хоҳлашади. Бироқ Сампаоли Месси йўқ бўлса-да, Дибалани умуман қайдномага ҳам киритмади.

Аргентина Мессисиз икки ўйин ўтказди, қайсидир маънода етакчисиз ўйин сифати қандай эканлигини кўрсатиб берди. Мураббий Мессининг ўрнига Ло Сельсони майдонга туширди. У яхши ўйнади, жуда фаол бўлди, бироқ барибир Лео даражасида эмас. Испанияга қарши ўйин Сампаоли хоҳлагандек ўтмади.

Хорхе тезроқ бир жиҳатни аниқлаб олиши керак: Аргентина Мессига таяниб ўйнайди ёки Месси Аргентинага таянади. Миллий термада Леонинг ўрнини босадиган футболчи йўқ. Бироқ жамоа максимал даражада ўйнаса, натижа бўлиши мумкин. Акс ҳолда Мессисиз терма юқори мақсадларни кўзлай олмайди.

Испания билан учрашувда жанубий америкаликларга креативлик етишмади. Ло Сельсо ҳақиқатдан ҳам қаттиқ ҳаракат қилди, бироқ унга вазиятларда айёрлик етишмади. Лопетеги Сампаолининг ҳар бир фишкаларини яхшилаб ўрганиб чиққанлиги кўринди. Бу орқали у рақиб жамоанинг барча меҳнатларини чиппакка чиқарди. Манчестернинг икки катта жамоалари ҳимоячилари Отаменди ва Рохо эса ўйин давомида жуда кўп хато қилди.

Аргентина Испания фонида жуда заиф жамоа эканлиги кўриниб қолди, Месси ўйнаган тақдирда терма мағлубиятдан қутулиб қола олмасди. Мадридда антирекорднинг такрорланишида Мессининг ҳеч қандай айби йўқ. Усиз терма ҳеч нимага қодир эмаслиги, мураббий эса бундай учрашувларда жамоани олдинга етаклай олмаслиги кўриниб қолди. Балким бу ўртоқлик учрашувидир. Лекин барчасига тайёр бўлиш керак эди.

Мессисиз Аргентина ва Роналдусиз Португалиянинг ўртасида катта фарқ бор. Роналдусиз Португалия деганда барча Евро-2016нинг финал учрашувини эслайди. Ўшанда Пайетнинг тўпга ташланишидан кейин Роналду жароҳат олгани, кўзида ёш билан майдонни тарк этгани... Ўшандан кейин ҳам терма яхши ўйнай олди ва ғалаба қозонди. Шунчаки, Португалия Роналдусиз ҳам ўйинда юта олишини кўрсатиб берганди.

Кўрдингиз-а, Аргентина Испаниянинг ҳужумларини, зарбаларини қайтаришга ожизлик қилди. Олтинчи гол ўтказиб юборилганидан кейин уларнинг ўйинини кузатиш жуда қийин бўлди. Бироқ улар ҳеч нима йўқотмаётгандек ўйнайверишди.

Лео жамоани бирлаштира олади, терма у билан дунёнинг барча термалари билан яхши ўйин кўрсатади. Эътибор беринг, терманинг ҳужумкор футболчилари қанчалик кўп. Игуаин, Ди Мария, Агуэро, Банега, Пасторе, Дибаласи бор терма жамоа натижани кафолатламади. Мессидан кейинги авлодда ким етакчиликни ўз қўлига олади? Лаббай, дейдиган футболчилар йўқ. Агар шу кетиш бўлса, Лео ЖЧ-2018ни юта олмайди. Тўғри, Аргентина жаҳон чемпиони бўла олмаса осмон узилиб ерга тушмайди. Бироқ биз ҳам бир буюк афсонанинг фаолияти якуни трагик бўлишини истамаймиз.

Миржалол Норматов таржимаси