Breaking news: "Бавария"нинг янги бош мураббийи номи аниқ!

Бу ҳақда немис матбуотининг ишончли нашри - "SportBild" эълон қилди.

Манбанинг ёзишича, "Бавария" раҳбарияти хорватиялик мутахассис Нико Ковач билан оғзаки келишувга эришган.

Асли хорватиялик мутахассис фаолиятини катта қисмини айнан Германияда ўтказган. Айни пайтда "Айнтрахт" жамоаси бош мураббийи саналган Ковач ёзда "Бавария" рулига ўтириши деярли ҳал этилди.

Нико Ковач қўл остида жорий мавсумда "Айнтрахт" ажойиб натижалар қайд этмоқда ва жамоа Бундеслигада кучли-учликка кириш учун кураш олиб бормоқда.

Нико Ковач футболчилик фаолиятини Германияда ўтказган. Шунингдек, Нико Ковач 2001-2003 йиллари Оттмар Хицтфельд қўл остида айнан мюнхенликлар таркибида ўйнаган.

Ушбу мутахассис маълум муддат (2013-2015) Хорватия терма жамоаси бош мураббийи сифатида ҳам ишлаган.

46 ёшли мутахассис футболчилик фаолиятида ярим ҳимоя чизиғида ўйнаган.

Эслатиб ўтамиз, "Бавария" жорий мавсумни муваффақиятсиз бошлагани сабабли, жамоа бош мураббийи сифатида ишлаб келган Карло Анчелотти кузда истеъфо чиқарилганди. Анчелоттини нафақадаги "Бавария" собиқ мураббийи, мюнхенликларнинг қадрли вакили Юпп Хайнкес алмаштирганди. 72 ёшли мутахассис эса жорий мавсум якунига етгач яна нафақага қайтади. "Бавария" раҳбарияти эса унинг ўрнига Нико Ковач номзодини маъқул кўрди.