Биринчи лига қандай бўлмоғи керак? Мухтор Қурбонов: “Худди олий лига каби ўтказиш керак”

Кимдир ҳудди олий лига каби ўтказиш керак деса, яна бошқа турли хил фикрларни илгари сурмоқда. Бугундан бошлаб, ҳар куни биринчи лиганинг мутахассислари билан суҳбатлашиб, уларнинг бу борадаги мусоҳабаларини бериб борамиз. Ажаб эмаски, ПФЛ ходимлари бунга эътибор қаратиб, бўлажак чемпионат тизимига айрим ўзгартиришлар киритса.

Демак, янги лойихамизнинг дастлабки меҳмони “NBU-Осиё”нинг собиқ мураббийига айланиб улгурган Мухтор Қурбоновдир.

- Биринчи лига чемпионатининг тизимига ўзгаритириш киритиш шарт деб ҳисоблайман. Бунинг учун ҳудди олий лига каби икки даврадан иборат бўлиши керак. Ўтган йили икки босқичли чемпионатни ўтказдик. Очиғи, иккинчи босқичга йўл олаётганимизда аутсайдерлардан олган очколаримиз бекор қилинди. Бу айрим клубларни чалғитиб ҳам қўйди. Тушунарсизроқ бўлгандек туюлди назаримда.

- Шунинг учун соддароқ шаклда, икки даврадан иборат чемпионат ташкил этилса мақсадга мувофиқ бўларди.

- Иштирокчи жамоаларни “Шарқ” ва “Ғарб” минтақасига ажратишдан кўзланган мақсад молиявий имкониятни тежаш эди. Агарда олий лига каби ўтказилса жамоалар моддий жиҳатдан қийналиб қолишлари мумкин деган фикрга борилган. Лекин икки даврадан иборат қилиб, сафар ўйинига борганда, бира тўла иккита учрашув ўтказиб, кейин ўз майдонида иккита рақибни қабул қилса ҳам бўлади. Адашмасам 1996- 1997 йиллардаги олий лига шу тартибда ўтказилганди. Шундай қилинса чемпионат қизиқроқ ўтади деб ўйлайман. Қолаверса биринчи лига жамоалари ҳам олий лига тизимига мослашиб боради.


Исломбек Рустамбеков ёзиб олди.