Биринчи лига. 3-ўрин “Қўқон-1912”га насиб этди. Қолганларчи...?

Бугун биринчи лиганинг сўнгги тур ўйинлари бўлиб ўтади. Олий лига йўлланмасини “Машъал” ва “Андижон” қўлга киритгани аниқ бўлди.
Шундан сўнг кураш 3-ўрин учун кечди. Унда “Қўқон-1912”, “Зарафшон-ПФК” жамоалари жиддий баҳс олиб борди. Якунда эса бу ўрин эгаси ҳам маълум бўлиб улгурди. Тоҳир Кападзе бошқарувидаги “Қўқон-1912” ҳар бир ўйинда керакли натижа қайд этиб, 3-ўринга муносиб эканлигини исботлади. “Зарафшон-ПФК” футболчилари эса кутилмаганда очколарни бой бериб, тезликни пасайтириб юборди. Шу боис бугун “Қўқон-1912” Урганчда “Хоразм”га имкониятни бой берган тақдирда ҳам қўқонликлар барибир якунда 3-ўринни эгаллайди. “Зарафшон-ПФК” эса 4-ўрин билан чекланади. 5-ўрин эгаси бугун аниқланади. Бу борада “Спартак” ва “Хоразм” ўртасида кураш кетмоқда.

Аутсайдерлар ўртасида ҳам бугун жиддий кураш бўлади. “Аланга” кейинги йил ҳам биринчи лигада иштирок этиши учун “пулька” ўйинларида иштирок этиши деярли аниқ бўлиб улгурган бўлса, 15-ўринни ё “Орол” эгаллайди ёки “Пахтакор-2”. Эътиборлиси бу икки жамоа бугун олий лига йўлланмасини нақд қилган жамоаларга қарши ўйин ўтказади. Кўрамиз бу борада кимнинг омади чопар экан.

Эслатиб ўтамиз, бугун биринчи лиганинг иккинчи босқич, 16-тур ўйинларининг барчаси соат 14:00да бошланади.

Исломбек Рустамбеков