Бахтиёр Ёқубов: “Пахтакор”дан очко олиш илинжида эдик

- Пахтакор чемпионат пешқадами. Таркиб жиҳатдан ҳам анча кучли жамоа. Шуни билган холда ўйинга жиддий тайёргарлик кўргандик. Чунки Тошкентдан очко билан қайтишни мақсад қилгандик,  - дея гап бошлади Бахтиёр Ёқубов.

- Ўзинглар ҳам кўрган бўлсанглар керак, учрашув кутилганидек қийин кечди. Лекин биз фақат ғалаба учун ўйнадик. Бунинг учун барчамиз охиригача курашдик. Бироқ учрашув бош ҳакамининг қарорлари зараримизга ишлади. Улар ҳақида кўп гапиришни истамайман. Майдонда нима юз берганини ҳамма кўрди. Муносиб баҳони мухислар бергани маъқул.

- Бутун учрашув давомида тенгма-тенг ўйнаб, сўнгги дақиқаларда гол ўтказиб юбориб, мағлубиятга учраш аламли бўлса керак. Боз устига пенальтидан?
- Албатта. Йигитларнинг бутун учрашувда қилган меҳнати якунда бесамар кетгани ачинарли. Бу ўйин билан камида дурангга лойиқ эдик.

- Пенальти борасида фикрингиз қандай?
- Ҳимоячимиз Рижко ўша вазиятда рақиб футболчиси билан тўқнашди.У атайлаб рақибига ургани йўқ. Назаримда, бу вазиятда ҳакам пенальти бермаса ҳам бўларди.

- Умуман олганда бош ҳакам тўғрисида фикрингиз қандай?
- Ҳакамнинг сўнгги дақиқаларда пенальти бергани учун эътироз билдирмайман. Ундан олдинги ҳолатларда ҳам ҳакам айрим қарорлари билан бизни ҳайрон қолдирди. Хусусан ҳимоячимиз Раҳматулло Бердимуродовга иккинчи сариқ карточкани бериш керак эмасди деб ўйлайман. Чунки Бердимуродов ўша вазиятда майдонда пайдо бўлиб қолган иккинчи тўпни ташқарига тепиб юборди. Чунки дарвозабонимиз бошқа тўпни олиб ўйинга киритаётганди. Ҳакам эса Раҳматуллони огоҳлантириб ўтирмасдан иккинчи “сариқ”ни бериб майдондан четлатди.

- Ушбу йўқотишдан кейин сизларга янада қийин бўлгандир?
- Албатта. Сафарда бир киши кам бўлиб ўйнаш осон эмас. Боз устига “Пахтакор”дек жамоага қарши 10 киши бўлиб тўп тепиш қийин. Лекин шунга қарамай баҳс охирига қадар ҳаммамиз очко олиш илинжида ўйнадик.

- "Навбаҳор" таркиби бу йил янгидан шакллантирилган бўлишига қарамай, жамоа турнир жадвалида юқори ўринлардан бирини эгаллаб турибди. Айтинг-чи, жамоа бунга қандай эришмоқда?
- Дарҳақиқат, таркиб бу йил тузилди. Жамоага яхши ва шу билан бирга юқори савиядаги ўйинчилар олиб келинган. Ҳамма бир-бири билан аҳил-иноқ. Худди бир оиладек. Бундай бўлишида табиийки бош мураббийнинг ўрни катта. Чунки Бахтиёр ака Ашурматов қисқа вақт ичида Наманганда курашчан жамоа туза олди. Ҳамма футболчилар учрашувга жиддий қарайди ва ижобий натижа йўлида бор кучини бериб ўйнамоқда.

Исломбек Рустамбеков суҳбатлашди.