Баҳром Ҳайдаров: "Иккинчи қизил карточка сабабли мағлуб бўлдик"

- Ўйинни бошланишиданоқ "Сурхон" ҳужумга ташланиши аниқ эди. Жамоа кетма-кет ўйинларда мағлуб бўлганди. Дастлабки 15 дақиқаликда ҳимояни яхши ушлашимиз керак эди. Буни уддаладик. Рақиб илк вазиятидан гол урди. Битта гол ўтказиб юбориш фалокатли ҳолат эмас. Иккинчи бўлимга яхши кайфиятда чиқдик. Иккала жамоа ҳам бир хил ўйин кўрсатди деб ўйлайман. Учрашув бошида ташаббус "Сурхон" томонда бўлди. Иккинчи бўлимга келсак, таймни яхши бошладик. Йигитлар ғалаба учун интилаётганди, лекин иккита қизил карточка... Битта қизил карточка унчалик сезилмаётганди. Бироқ иккинчиси рақибга катта устунлик тақдим қилди. Шуни ҳисобига ўйин охирида кучимиз етмай қолди. Тўққизга ўн бир ҳолатда ҳам охиригача ўйнашимиз керак эди. Бироқ буни уддалай олмадик.

- "Қўқон-1912" ҳисобни тенглаштиргандан кейин Сиз Баҳром Абдураҳимовни туширмоқчи бўлдингиз ва икки ҳужумчини алмаштиришга тайёрланаётгандингиз. Бу нима билан боғлиқ? Иккинчи саволим: карточкалар жамоага ҳалақит қилди. "Қўқон-1912"да карточкаларнинг кўпайиб кетаётгани нима билан боғлиқ? Тартиб-интизомми ёки бошқа ҳолатлар борми:

- Буни тартиб-интизом билан боғламаган бўлардим. Чунки бу ўйин эпизодлари. 1:1 бўлганидан кейин Шаҳзод Бешимов ҳамда Муҳаммаданас Ҳасановни захирага олмоқчи эдим, бироқ ўша ҳолат бўлиб қолди. Улгурмадик. Ўйин тугашига 5-10 дақиқа қолганида бўладиган тўполон-жанжаллар футболда бўлиб турадиган ҳолат. Албатта, футболчи ўзини ушлаши керак. Бироқ буни ёмон ҳолат деб ўйламайман. Дуранг пайтда ҳужумчини тушириш ўйиндан келиб чиқиб амалга оширилади. Бизда ўйинни дурангга олиб бориш ниятимиз йўқ. Бугун дуранг ҳам биз учун ёмон натижа бўлмасди. Ғалаба қозонишимиз ҳам мумкин эди. Ўзгаришлар тайёрланаётган пайтда биз рақибга катта босим ўтказаётгандик. "Сурхон" ёш жамоа, футболчилар бироз довдираётгани кўринди. Иккинчи қизил карточка эса уларга катта руҳий ёрдам бўлди. Шуни ҳисобига рақиблар ғалаба қозонди.

- "Сурхон" айни дамда Суперлиганинг энг ёш жамоаларидан бири бўлиб турибди. Шу боисдан "Қўқон-1912" бугун агрессивроқ ўйин намойиш қилади, кўпроқ ҳужум қилади деб ўйлагандим. Бироқ "Сурхон" илк дақиқалардан тезкор гол учун ўйнади. Бугун "Қўқон-1912"дан нега агрессив футбол кўрмадик?

- Буни ўрганиб чиқамиз. Агрессив футбол ўйнаб, ғалаба қозониш кераклигини йигитларга тушунтиряпмиз. Бу саволга аниқ бир жавобим йўқ. Барчасини кўриб чиқишимиз керак.