БАА U-17 мураббийи: “Қизил карточка ноҳақ кўрсатилди”

Мусобақа мезбонлари дастлабки турни Гондурасга қарши ўтказиб, 1:2 ҳисобида имкониятни бой беришди. Учрашувнинг 26-дақиқасида БАА бир киши кам бўлиб қолди, негаки ярим ҳимоячи Султон Ал Шамси рақиб футболчисининг оёғига ташлангани учун ўша заҳоти майдондан четлатилди.

Ўйиндан кейинги матбуот анжуманида БАА ўсмирлар термаси бош мураббийи Рашид Амир Ал Бадвави “қизил” берилган вазиятда италиялик ҳакам хатога йўл қўйганини айтиб ўтди:

“Менинг фикримча, ўйинчимиз “қизил”га тортадиган қўполликни амалга оширмади. Тўғри, у тўпни олиб қўйиш мақсадида қўполлик ишлатди, бироқ бу ҳаракат кўп борса “сариқ”қа тортарди. Менимча, бу вазиятда ҳакам хатога йўл қўйди. Умуман олганда, ўйинни ёмон бошламадик. Лекин кутилмаганда футболчимизнинг четлатилиши бир қатор режаларни чиппакка чиқарди. Энди кейинги босқичга чиқиш учун навбатдаги икки беллашувда ғалаба қозонишимиз талаб этилади”.

Х.ХОЛИҚОВ тайёрлади.