Асрор Ғофуров: “Бангладешга ўтишим ортга ташланган қадам эканини биламан, бироқ ўша вазиятда бошқа чорам йўқ эди”

Футболчи билан боғланиб, у билан янги жамоаси ва мақсадлари борасида суҳбатлашдик. 

Бангладешга йўл олиши борасида

- “Сурхон”даги хунку воқеадан кейин ЎФА футбол билан боғлиқ ҳар қандай фаолиятдан четлатди. Чемпионат баҳслари ҳам тугаб, янги мавсум бошланишига эса яна 4-5 ой вақт бор эди. Шунча вақт уйда ўтиришни истамадим. Бу орада Бангладешнинг 2-3 жамоаси менга таклиф билан чиққанди. Бироқ мен барчасига рад жавобини бериб келаётгандим. Кутилмаган вазият юзага келганидан сўнг спорт формамни ушлаб туриш учун ҳам “Саиф Спортинг” таклифини қабул қилдим. Чунки қанча вақт ўйнамасам, бу менинг спорт формамдан чиқиб кетишимга сабаб бўларди. 

Шартномаси муддати ва шароитлар тўғрисида 

- “Саиф Спортинг” билан 2022 йилнинг 31 августига қадар шартнома имзоладим. Бу клуб Бангладешнинг энг яхши 3-4 жамоасидан бири ҳисобланади. Клуб менга барча шароитларни яратиб берган. Умуман олганда, клуб тизимида яратилган имконият ва инфратузилма бизнинг Суперлига жамоаларидан асло қолишмайди. Қисқаси, барчаси мени қониқтирмоқда.

Бангладеш футболи савияси борасида

- Ҳозирча чемпионат ўйинлари бошлангани йўқ. Кубокда иштирок этдик. Савия жиҳатидан бизнинг футболга солиштириб бўлмайди. Бу ерда футбол босқичма-босқич ривожланмоқда. Дейлик, ҳар бир жамоада яхши савияли легионерлар бор. “Саиф”да ҳам Бангладеш миллий терма жамоаси сардори ва бир нечта футболчилари тўп тепади. 

Бу ерга келиши ҳақида

- Бангладеш чемпионатига йўл олишим ортга ташланган қадам бўлиши мумкин. Лекин бир нарсани тушунинг, мен уйда ўтириб кутганимда, спорт формадан чиқиб кетардим. Ўша вазиятда бошқа йўлим йўқ эди. Шу томонларини инобатга олиб, “Саиф Спортинг” таклифини қабул қилдим. 

Асосий мақсад хусусида

- Мақсадимиз – чемпионликни қўлга киритиш ҳисобланади. Чунки жамоамиз таркиби бунга муносиб. Бизда Нигерия, Руанда миллий терма жамоаси футболчилари ҳам бор. Тажрибали мутахассис фаолият юритмоқда.  Шунингдек, маҳаллий яхши ижрочилар ўйнамоқда. Ишонаманки, мавсум якунида биз албатта асосий мақсадимизга эриша оламиз.