Асқар Умаров: "Турон"га қарши очиқ футбол намойиш этдик"

Ўйин ҳақида

- Бугун қизиқарли ва очиқ ўйин гувоҳига айландик. Учрашув давомида устунликка ҳам эга бўлдик, бир қатор вазиятлар яратдик. Ўз имкониятларимиздан фойдалана олмаганимиз туфайли мағлубиятга учрадик. Лекин йигитлар бунинг ғалаба учун астойдил ҳаракат қилишди, бунинг учун уларга раҳмат айтаман. Хатолар устида ишлаймиз. Келаси ўйинларда ғалаба қозониб мухлислар олдида юзимизни ёруғ қиламиз деган умиддамиз.

- Ўтган мавсум Биринчи лигада ҳаракат қилган футболчиларнинг қанчаси сақлаб қолинди? Футболчиларингизга Биринчи лига ва Про-лига фарқи қай даражада сезилмоқда?

- Ўтган мавсумдаги таркибнинг 90-95 фоизи сақлаб қолинган. Йигитларда бу икки лига ўртасидаги фарқни сезганим йўқ. Барчалари имконият даражасида астойдил ҳаракат қилишмоқда. Ўйинлар давомида ўсиб борамиз ва керакли очколарни қўлга киритамиз деган умиддаман.

- Натижалардан келиб чиқиб таркибга янги футболчилар жалб этилиши мумкинми?

- Албатта, ҳозир биз тўлдирилиши лозим бўлган чизиқларни кузатиб бораяпмиз. Вазиятдан келиб чиқиб таркибга янги футболчиларни жалб этиш режамизда бор.

- Ўтган турда "Бухоро" билан сафардаги дуранг натижа туфайли мухлислар бугун ғалаба кутишаётганди. Мағлубиятни қандай изохласа бўлади?

- Бугун биз очиқ футбол намойиш этдик. Ўйин аввалида футболчиларга шу кўрсатмаларни бергандик. Рақиб ўз хатоларимиз эвазига голлар киритди. Изланишда, ишлашда давом этамиз.