Артём Петросян: "Бундай ўйинларда ютқазиш аламли, айниқса, бир киши кўп бўлиб ўйнаганда"

- Ўйин ҳақида

- Аввало, бетоб бўлиб қолган Жасур Биродарович Абдураимовга тезроқ соғайиб кетишини тилайман. Ўйинни кўрдингиз, иккинчи голни уришимиз лозим бўлган бир пайтда рақиб қарши ҳужумга ўтишига йўл қўйиб бердик ва дарвозамиз томон пенальти белгиланди. Афсуски, икки марказий ҳимоячимиз жароҳат олди ва ўйин якунида гол ўтказиб юбордик. Бундай ўйинларда ютқазиш аламли, айниқса, бир киши кўп бўлиб ўйнаганда. 

- Бугун дарвозани нега Акмал Турсунбоев эмас, Владимир Вагин қўриқлади?

- Ёш футболчи Вагинга имконият беришни хоҳладик. Унга катта эътироз йўқ. Акмал Турсунбоев ўтган ўйинда хатоликларга йўл қўйганди, шу боис машғулотларда фаоллик кўрсатаётган ёш посбонимизга ишонишга қарор қилдик.

- "Металлург"ни "Қизилқум" ва "Насаф" сингари кучли рақибларга қарши сафар ўйинлари кутиб турибди. Жамоа Про лигага тушиб кетмаслиги учун нималарни режалаштиряпсизлар?

- Нима дейишим мумкин, жуда қийин ҳолатдамиз. Суперлига турнир жадвалида "хавфли ҳудуд"га яқинлашиб қолдик. Ишлашда давом этамиз, ўз устимизда ишлаб, кейинги ўйинларга тайёрланишимиз керак. Асосийси – таслим бўлмаслик.