Анвар Бердиев: "Мағлубият учун барча айбни ўз бўйнимга оламан"

Ўйин ҳақида

- "Андижон" жамоасини кейинги босқичга чиққани билан табриклайман ва кейинги ўйинларда омад тилайман. Биринчи голни яна стандарт вазиятдан ўтказвордик. Бу жамоа билан ўтган ўйиндан фарқли равишда 5 та ўзгаришга қўл урдик. Якунда барибир "Андижон" яна ғалабага эришди.

- Ҳумоюн Муртозаевни ноўрин ҳаракатини қандай изоҳлаган бўлардингиз?

- Албатта, бу футболда хунук ҳолат. Унинг бу ҳаракати учун андижонлик мухлислардан узр сўрайман. Биз ўйинни таҳлил қиламиз, Муртозаев билан бу борада гаплашиб оламиз. Чемпионатдаги ўйинда, яъни Яйпанда ўтган баҳсда "Андижон"нинг 20-рақамли футболчиси шундай ҳаракатни амалга оширганди. Балки шу холат футболчига жавоб тариқасида амалга оширгандир. Мен доим таъкидлайман, футболчи бундай вазиятлардан йироқда бўлиши керак. Яна бир бор андижонлик мухлислардан ўша вазият учун узр сўрайман.

- "Турон" чемпионатда ҳам, кубок ўйинларида ҳам "Андижон"га мағлуб бўлди. Про-лига чемпионлиги учун курашда "Андижон"ни фаворит деб ҳисоблайсизми?

- Йўқ, бундай ўйламаган бўлардим. Чунки олдинда ўйинлар кўп, ҳали ҳеч нарса ҳал бўлгани йўқ. "Машъал", "Бухоро", "Турон" ва "Андижон" жамоалари ўртасида Суперлига учун кураш жиддий кечади.

- Икки бўлимда икки хил ўйин гувоҳи бўлдик. Тажрибали футболчиларни асосий таркибда туширсангиз бўлмасмиди?

- Албатта бўларди. Мағлубият учун барча айбни ўз бўйнимга оламан. Таркиб танлаш борасида хатога йўл қўйдим. Яйпанлик мухлислардан ҳам узр сўрайман, улар чемпионат доирасидаги ўйинда мағлуб бўлганимизга қарамай яна бугун бизга ишониб келишди. Клуб раҳбариятидан ҳам узр сўрайман. Кўзи ёниб турган, имконият беринг деб сўраб турган футболчиларни майдонга туширгандим. Натижани эса кўриб турибсизлар. Иккинчи бўлимда 4 та ўзгариш қилдик, бу холат ўйинда бурилиш ясай олди.

- Жамоа Андижонга ўйиндан бир кун аввал келмаганига сабаб нима?

- Бу менинг таклифим эди. Ўтган гал бир кун аввал келиб мағлуб бўлгандик. Шу сабабдан биз клуб раҳбарияти олдида хижолат бўлиб бир кун аввал келиб уларни қўшимча ҳаражатлар сарфлашларини истамадик.

- Танлаш имкони бўлса, кубокдаги ғалабани танлардингизми ёки чемпионатдагиними?

- Мураббий учун ҳар бир ўйиндаги ғалаба муҳим. Майдонга чиқдикми, ғалаба учун ўйнашимиз шарт, қайси мусобақа эканининг аҳамияти йўқ.