Анвар Бердиев: "Футболчилар ўз даражасида тўп тепса, Про лигадаги барча жамоага қаршилик кўрсата оламиз"

"Авваламбор, ассалому алейкум. Ўйинни стадиондан кузатдинглар, жуда ҳам қийин бўлди. "Шўртан" жамоасининг кучли томонларини билгандик, шунга яраша тайёргарлик кўрдик. Йигитларга алоҳида миннатдорчилик билдираман, қўлларидан келганича ҳаракат қилишди. 6-7 нафар асосий ўйинчиларимиз кетиб қолди. Лекин, жамоада қолган футболчилар ҳам улардан кам эмас. Ким ўзининг даражасида ўйнаса, биз Про лигадаги барча жамоаларга қаршилик кўрсата оламиз. Шу гапни мен бир неча кун олдин футболчиларга тушунтирдим. Аллоҳга шукур, ўзимизга керакли бўлган натижани қўлга киритдик. Бу ўйин тарихга айланди. Эндиликда навбатдаги ўйинларга тайёргарликни давом эттирамиз",- дейди Анвар Бердиев.

- Футболчи ўзига жавоб беради, мураббий эса бутун жамоага. Шу боис, мураббийлик фаолиятингиз қандай ўтмоқда?

- Барча футболчиликни тугатган мураббийлар шу гапни айтишарди. Ҳозир шуни бошимдан ўтказиб ҳис қилиб турибман, майдон четида туриш жуда қийин. Тўғри, футболчи бўлсангиз бир ўзингизга жавоб берасиз, мураббий эса бутун жамоадагиларга жавоб беради. Осон ишнинг ўзи йўқ, мураббийлик ва футболчиликнинг ўзига яраша қийин томонлари бор. Майдонни четида туриб бошқариш ҳақиқатдан ҳам қийин экан. Бу нарсани энди тушуняпман. 

- Таркибга янги жалб этилган футболчиларда ўйин амалиёти кам эди. Аммо, уларни руҳлантира оляпсиз. Бунга қандай эришяпсиз?

- Мен ўзим жалб қилган футболчиларнинг имкониятини яхши биламан. Улар футбол ўйнаб юрган футболчилар. Тўғри айримларида ўйин амалиёти йўқ эди. Лекин, футболчиларга таъкидладим, тўп тепиб юрган футболчи бирданига ўйнолмай қолиши мумкин эмас. Футболчи майдонда неча дақиқа ҳаракат қилса ҳам жонини бериб ўйнаши керак. 

- Олдинда бундан ҳам қийин ўйинлар кутмоқда. Жамоадаги ва захирадаги футболчиларнинг жисмоний тайёргарлигидан кўнглингиз тўляптими?

- Тўғрисини айтаман, бизда жисмоний тайёргарлик бўйича вақт йўқ эди. Жамоада қолган футболчиларнинг жисмоний тайёргарлиги ёмон эмас. Янги келиб қўшилган футболчилар машғулотда алоҳида дастур асосида шуғулланишмоқда. Ўйлайманки, бу футболчилар ҳам ўйиндан-ўйинга кучайиб боришади. Фирдавс Асадов икки кун олдин келиб қўшилди. У ўз даражасига чиқиб олса жамоамизга бўлажак ўйинларда ёрдам беради. Вилоят ҳокимимизга ва клубимиз раҳбарларига алоҳида раҳмат айтмоқчиман. Улар бизни қўллаб-қувватлашмоқда. Мана ҳозир ҳам жамоамиз раҳбарлари футболчиларнинг олдига кириб миннатдорчилик билдиришди. Бу футболчиларимизга қўшимча куч бағишлайди. Шу қатори менга ҳам. Менга ишонч билдиришаётган экан оҳиригача курашамиз. Билган нарсаларимни футболчиларга ўргатиб, уларнинг майдонда бор кучи билан ўйнашларини кўришни истайман. Яна қайтараман, жамоамизни тиклаб, эътибор берганликлари учун вилоят ҳокимимизга миннатдорчилик билдириб қоламан. "Истиқлол" стадионини қайтариб беришгани ва шу ерда ўйинларимизни ўтказаётганимиз учун ҳам раҳмат айтаман.