Анвар Бердиев: "Бизга битта нарса етишмаяпти - гол"

Дерби мақомидаги ўйин, голгача давом этди деб ўйлайман. Агар биз биринчи гол урганимизда ғалаба қозонардик. Ғалаба учун гол уриш керак. Вазиятлар бор, аммо улардан фойдаланишда оқсоқланаяпмиз. "Нефтчи"ни ғалаба билан табриклаймиз. Фурсатдан фойдаланиб "Турон" клуби раҳбариятига раҳмат айтмоқчиман, ажойиб майдон ва шароит учун", - дейди Анвар Бердиев. 

- "Истиқлол" кетма-кет икки турдан буён ғалаба қозона олмаяпти. Бунга нима сабаб бўлди?
- Ўтган йил бошқача тактикада ўйнардик. Ҳимоядан эмас ҳужумкор ўйин намойиш этишга ҳаракат қилаяпмиз. Машғулотларда ҳужумчиларимиз қийин вазиятлардан ҳам гол уришади, ўйинда эса омадимиз келмаяпти. "Турон"га қарши ўйиндан кейин "Нефтчи" билан баҳсга қадар машғулотларда вазиятлардан фойдаланиш учун жиддий ишладик. 90 дақиқа давомида ҳимояда ўйнаб гол ўтказмаслик қийин. Бизга гол етишмаяпти. Агар гол уриб юта олсак футболчиларнинг ишончи ортади ва ҳар сафар шундай ўйнашга одатланиб қолади.

- Трансфер ойнаси вақтида жамоани кучайтириш учун қандай ишлар олиб борилди?
- Биз истаган футболчилар ўз жамоаларида асосий таркибда ўйнашмоқда. Қолганлар эса таркибимиздаги футболчилардан кучли эмас.

- Клуб ёшлар жамоасида асосий таркибга қўшилиб кета оладиган ва кучайтира оладиганлар борми?
- Афсуски йўқ. Уларни машғулотларга жалб қилаяпмиз. Кўраяпмизки катта футболга кириб келиш учун қадам ташлашлари керак. Болалар футболида катта футболга ўтиш қийин жараён.