Андрей Шипилов: "Ўзбекистон суперклубидан очко олдик"

Андрей Шипилов: - "Аввало бугунги ўйин ташкилотчиларига катта раҳмат айтаман. Улар бугун яхши ишлашди. Барчага 5+ баҳо қўяман.

Биринчи бўлимда биз олдимизга қўйилган вазифани бажара олмадик. Тезкор гол ўтказиб юбордик, ҳимояда пала-партиш ўйнадик. Кейинчалик ўзимизга келдик ва кучимизга куч қўшдик. Яширмайман, натижа мен учун кутилмаган бўлди. Албатта, бунга "Локомотив"даги ўзгаришлар ҳам сабаб. Биз Ўзбекистоннинг суперклубидан очко олишга эришдик. Бу клуб билан бошқачасига ўйнаб бўлмасди.

"Локомотив" 3 кундан кейин яна бир муҳим баҳсни ўтказади. Бироқ таркибда бундай ўзгаришлар бўлишини кутмагандим. Шундай бўлса ҳам йигитларга рақибнинг қандай кучга эга эканлигини тушунтиришга ҳаракат қилдим. Улар барча ишларда тартибли ўйнашади. Ҳар бир позиция учун 2-3 нафардан жуда тажрибали футболчилари бор"

Акбар Исматуллаев: - "Ўйин қизиқарли бўлишини билардик. Энди иккинчи ўйинни ўтказдик. 80-90 фоиз футболчи жамоа таркибига яқиндагина келиб қўшилган. Ўйлайманки, ўйиндан ўйинга очилиб борамиз ва шу орқали бекободлик мухлисларимизни хурсанд эта оламиз.

Биламиз, "Локомотив" жамоаси ОЧЛда ўйнамоқда, жуда кучли таркибга эга. Биз ҳам қўлимиздан келганча ўйнаб, натижани қўлга киритдик"