Андрей Микляев: "Омад бизга кулиб боқди"

Андрей Микляев («Локомотив» жамоаси бош мураббийи): - Учрашув гувоҳи бўлганларингиздек, бироз асабий тарзда ўтди. Яъни ҳис ҳаяжон ўз таъсирини ўтказди. Яхшиямки, ўйин охирларида омадимиз чопиб, ғалабани қўлга киритдик. Умуман олганда баҳс давомида устунликка эришдик. Бугун таркиб борасида айрим муаммоларга дуч келгандик. Икки нафар асосий ҳимоячиларимиз Яничич ва Мустафоевлар жароҳат туфайли майдонга туша олишмасди. Шу сабабли айрим ўзгаришларни амалга оширишга мажбур бўлдик. Учрашувда одатий услубимиз, яъни ҳужумкор ўйин кўрсатиш борасида айрим қийинчиликларга дуч келдик. Майдоннинг ҳолати бунга сабаб бўлди. Бундай шароитда ҳимояланишдан кўра ҳужумлар ташкил этиш осон бўлмайди. Гол уриш учун имкониятлар бўлсада, хатоларга йўл қўйдик. Бунинг оқибатида, ўз дарвозамиздан иккита тўп олиб чиқишга мажбур бўлдик. Шундан сўнг гол уришимиз осон бўлмади. Йигитларга охиригача курашганликлари учун раҳмат айтиб ўтган бўлардим. Натижада омад бизга кулиб боқди.