"Андижон"нинг 50 ёшига совға ёхуд ЎФФ раҳбарлари Андижонда бўлдилар!

Мираброр Усмонов бошчилигидаги катта делегациядан Наримон Жалолов, Сардор Раҳматуллаев, Фарҳод Магометов, Мухтор Ҳошимов, Ойбек Касимов, Мурод Алиев, Шавкат Жалилов ва Шавкат Имомов ўрин олишди.

Андижонга боришдан асосий мақсад, вилоятда спорт турларига жиддий эътибор қаратиш, вилоят футбол жамоасининг инфраструктурасини кучайтириш, МОҚ томонидан белгилаб олинган истиқболли спорт турларига бўлган эътиборни ошириш бўлди.

Вилоят ҳокимиятининг мажлислар залида бўлиб ўтган катта йиғилишда, вилоят ҳокими Шуҳратбек Қўшоқбоевич Абдураҳмонов ҳам иштирок этди. 

Мираброр Усмонов вилоятда бокс, кураш, дзюдо, ўқ отиш, қиличбозлик, енгил ва оғир атлетикани ривожлантириш лозимлигини таъкидлаб ўтди.

Мажлисда Андижон спортига ўзининг муносиб улушини қўшган мураббий ва спортчилар ҳам иштирок этдилар. 

Хабарингиз бор, жорий йил клуб фаолиятини бошлаганига роппа-роса 50 йил тўлди. Гарчанд, жамоа олий лигадан тушиб кетган бўлса-да, тўйга тўёна деганларидек, Мираброр Зуфарович андижонликларга 2015 йилги мавсумда ҳам олий лигада иштирок этишларини айтиб ўтди. Шу билан бирга Мираброр Зуфарович, энди Олимпиада ўйинларига лицензияни қўлга киритган ҳар бир спортчи алоҳида рағбатлантирилиши, Олимпиада ўйинларининг совриндорлари эса Лондон олимпиадасига солиштирганда икки баробар кўп миқдорда мукофот олишларини айтиб ўтди. 

Ўз навбатида вилоят ҳокими сўнгги икки йилда клубга туширилган пуллар тўғри йўлда фойдаланилмагани, бундан кейин эътиборлироқ бўлиш лозимлигини таъкидлаб, энди катта маошлар белгиланмаслиги, аксинча, забт этилган ўринга қараб қўшимча бонуслар берилишини айтиб ўтди. 

Эслатиб ўтамиз, бундан бир неча ҳафта муқаддам клубга Шуҳрат Ўринбоев вице-президент этиб тайинланган эди.