“Андижон” олий лигага олий мақсад сари

Бу борада “Андижон” жамоаси ҳам катта иштиёқ билан ёзги йиғинга киришган. Биринчи даврада ўз имконияти даражасида қатнаша олмаган “бургутлар” бор эътиборини иккинчи даврага қаратишган десак муболаға бўлмайди. Олий лигага қайтиш вазифаси қўйилган ва бу йўлда улар астойдил ишламоқдалар. Жамоага бўлган эътибор эса юқори даражада. Масалан, куни кеча машғулотлардан бирига вилоят ҳокими Шуҳратбек Абдураҳмонов ташриф буюриб, жамоанинг тайёргарлиги билан яқиндан танишди. Мураббий ҳамда футболчилар билан майдонда суҳбатлашиб, уларни янада руҳлантирди. Барча шарт-шароитларни яратиб бериши ҳақида ва бунга жавобан футболчилардан фақат ғалабаларни кутиши, мусобақада 1-ўринни эгаллаб олий лигага йўл олиши шартлигини ҳам алоҳида таъкидлаб ўтди. Хуллас, “Андижон” жамоаси катта иштиёқ билан иккинчи даврага тайёргарлик кўрмоқда. Бош мураббий Усмон Тошев эса жамоасининг иккинчи даврага тайёргарлик режалари билан ўртоқлашди.

- 8 июлдан машғулотларни бошладик, - дейди Усмон Қудратович. - Андижонда 21 июлга қадар шуғулланамиз. Бу вақт оралиғида учта назорат ўйинини ўтказамиз. Чунки футболчиларни тезроқ саралаб олишимиз керак. Хабарингиз бор, айни пайтда сафимизда 40 дан зиёд ўйинчилар шуғулланишмоқда. Бизга уларнинг ким эканлигини фарқи йўқ. У ёш бўладими ёки каттами, муҳими, ҳаммасини ҳурмат қилган ҳолда йиғинлар давомида кўриб чиқяпмиз. Лекин битта қийинчилик томони борки, бизда етарли вақт йўқ. Биз барчасини шошилмасдан батафсил текшириб олиш имкониятига эга эмасмиз. Шунинг учун ҳаммасини тез-тез бажаришга ҳаракат қиляпмиз ва якунда энг яхши футболчиларни саралаб олмоқчимиз. Мақсадимиз биринчи лигада 1-ўринни эгаллаб олий лига йўлланмасини қўлга киритишдир. Шу маънода жамоани шакллантиришга ҳаракат қиляпмиз. Кейин Тошкентда бўламиз. Пойтахтда тиббий кўрикдан ўтамиз. Тошкентдаги йиғинни тугатганимиздан кейин йигитларга қисқа муддатга дам берамиз. Кейин эса иккинчи давра бошланишига бир ҳафта вақтимиз қолади. 4 августда “Навбаҳор”нинг асосий таркибига қарши ўртоқлик учрашувини ўтказиш борасида улар билан келишиб олдик. Сўнг яхши кайфият билан” NBU-Осиё” ва “Янгиер”га қарши ўйинлар учун жўнаб кетамиз.

Албатта, бош мураббий таъкидлаб ўтганидек, тайёргарлик жараёнида назорат учрашувларига ҳам алоҳида эътибор қаратилмоқда. Биз эса ундан айнан қайси жамоаларга қарши беллашувлар бўлиб ўтиши ҳақида сўрадик.

- Андижондаги дастлабки ўртоқлик баҳсидаги рақибимиз – “УзДонгЖу” бўлди. Кейин эса 15 июль куни “Қўқон-1912”нинг ўринбосарларига қарши ўйнаймиз. 19-кунига “Нефтчи” ўринбосарларига қарши ўйин ташкил қилмоқчимиз. Тошкентдаги йиғинимиз давомидаги иккита ўйинимизни олий лига клубларига қарши ўтказишга ҳаракат қиламиз. Лекин иккинчи ўйинимизни ўтказиш озгина муаммо бўлиши мумкин. Чунки пойтахтдаги иккинчи ўйинимиз иккинчи давра бошланишига яқин бўлади. Бундай пайтда эса клублар асосий эътиборини чемпионат бошланишига қаратишган бўлади. Агар иккинчи ўйинимиз учун олий лигадан рақиб топа олмасак, унда биринчи лиганинг бирор-бир жамоаси билан ўйнаймиз. Биласизми, назорат ўйинлари давомида бизга ютишнинг кераги йўқ. Асосийси, бундай ўйинлар орқали жамоанинг ўйинини шакллантириб олишни истаяпмиз.

Жамоанинг машғулотини кузатар эканмиз, мураббий қўли остидаги барча футболчилар катта иштиёқ билан ишлаётганликларига амин бўлмоқдамиз. Усмон Тошев жамоа ўйинини олий лига савияси бўйича тайёрлаётгани эътиборга моликдир. Шу боис у ҳозирги йиғинда асосий эътибор нимага қаратилаётгани ҳақида ҳам гапирди.

- Машғулотларда футболчиларнинг ишлаш жараёнидан ҳеч қандай қийинчилик йўқ. Ҳаттоки, биринчи давранинг охирги учта ўйинида кўрганимда ҳам уларга катта эътирозларим бўлмаган. Чунки йигитларнинг интилиши бор. Футболчиларни ўйнай олиши ёки ўйнай олмаслигига эса фақат мураббий жавоб беради. Юқорида айтганимдек, йиғинимизда 40 дан зиёд ўйинчилар шуғулланишяпти. Уларнинг орасида тортиб кетадигани ҳам, тортиб кета олмайдиганлари ҳам бор. Ўтказадиган ҳар бир назорат ўйинидан кейин йигитларни саралаб бораверамиз. Ҳамма бир хил эмас. Кимнидир кучи ўртача бўлса, яна кимнидир уникидан баландроқ. Хуллас, жамоани яхшилашга ҳаракат қиляпмиз. Айни дамда уларнинг жисмоний ҳолатига эътибор қаратяпмиз. Шундан келиб чиққан ҳолда футболчиларнинг техник қобилиятларига ҳам эътибор қаратяпмиз. Албатта, бундай иссиқ ҳавода футболчилар жисмоний машқларини “кўтариши” қийин. Чунки футболчилар ҳар хил жойдан келишган. Ҳаттоки, ярим йил давомида ҳеч қаерда ўйнамаган ўйинчилар ҳам бор. Шунинг учун имкон даражасида уларнинг жисмоний ҳолатини ҳам яхшилашга уриняпмиз.

Айтиш керакки, клуб селекия борасида фаол ишларни олиб боряпти. Чунки мақсад олий лига бўлгани сабабли таркиб ҳам шунга яраша бўлиши керак. Мухлислар эса таркибга янги қўшилаётган ўйинчилар билан қизиқмоқда.

- Албатта, биз ҳам яхши биламизки, ишқибозларга яхши, номи чиққан футболчилар керак, - дейди Тошев. - Биз ана шундай ўйинчиларни чақирганимиздан ташқари улар албатта ўйнай олишлари ҳам керак. Агар бу биринчи лига деб ўз имконияти даражасида ўйнай олишмаса, у ҳолда уларни жамоада олиб қола олмаймиз. Лекин сиз ҳам биласизки, биринчи давра билан иккинчи давра оралиғида аксарият ўйинчилар ўз клублари билан банд бўладилар. Уларнинг аксарияти асосан чемпионат тугаганидан кейин шартномалари тугайди. Лекин Худога шукрки, ҳозирги шароитда ҳам ўзимиз хоҳлаган футболчиларни топа оляпмиз. Ким қидирса топади, деб бежизга айтишмайди. Улар билан шартномалар имзолаганимиздан кейин албатта хабар берамиз. Бир қатор футболчилар билан эса хайрлашдик. Улар билан телефон орқали гаплашдик. Хеч қандай муаммо йўқ ва бир-биримизга омад тиладик. Балки яна бир қатор футболчиларга жавоб берамиз. Футболда хафагарчилик бўлмаслиги керак.
Шунингдек, Усмон Қудратович мураббийлар штаби борасида ҳам тўхталиб ўтди.

- Мураббийлар штабидан кўнглим тўқ. Аммо барибир ҳам бизга яна бир-иккита мутахассис керак. Футбол жамоасидан нафақат ўйинчиларнинг аҳамияти катта, балки ошпаз, шифокор, массажчи, мураббийлар ҳам малакали бўлсалар, иш самарадорлиги ошиб бораверади. Ҳар бир мутахассис ўзига юклатилган ишни қилиб борса ҳаммаси жойида бўлади. Искандер Галиулин биз билан бирга ишлаяпти. У ақлли, тажрибали мураббий. Ўз ишига 100 фоиз берилиб ишлайди. Ёш мураббийларимизга кўп нарсаларни ўргатади. Биз параллел равишда айнан маҳаллий ёш мураббийларни ҳам тайёрлаяпмиз. Чунки келажакда Андижонга бундай кадрлар керак бўлади. Кетганимиздан кейин ўзимизда яхши из қолдиришимиз керак.

Фирдавсхон