«Андижон» жамоаси машғулотларга зўр бермоқда

Маълумки, Усмон Тошев шогирдлари 20 август, якшанба куни бўлиб ўтадиган 21-турда дам олади. 23 августда эса ўз майдонида Фарғонанинг «Истиқлол» жамоаси билан беллашади. Шу боис андижонликлар бор эътиборини ушбу ўйинга қаратишган.

Футболчилар айни пайтда машғулотларга зўр бермоқдалар. Бўстон дахасидаги футбол мактаби стадионида олиб борилаётган машғулотларда ўйинчилар мураббийларнинг кўрсатмаларини тўлиқ бажаришмоқда. Дарвоқе, кечаги машғулотда жамоа тўпурари ва етакчиси Анвар Бердиев бироз шамоллаб қолгани учун машғулотда қатнаша олмаганди. Бугун эса хужумчи умумий гуруҳ билан машқларга киришди. Айтиш керакки, бугунги машғулот бошланишидан олдин жамоа устози Усмон Тошев барча ўйинчиларни бир жойга йиғиб уларга тегишли кўрсатмаларни берди ва машғулотларда қандай ишлаш кераклигини, нималарга эътибор қаратиш лозимлигини яна бир бор тушунтириб ўтди. Шундан сўнг жамоа аъзолари тўп билан ишлашга ўтдилар. Футболчилар ўз устида астойдил ишлаётганликлари билиниб турибди. Қолаверса, жамоа аъзолари кўтаринки рухда шуғулланишда давом этмоқдалар.

"Андижон" ФК матбуот хизмати.