«Андижон» чемпионатнинг сўнгги турларига тайёргарликни бошлади

Кеча жамоа аъзолари клуб қароргоҳида йиғилди ва чемпионатнинг сўнгги икки турига жиддий ҳозирлик кўришни бошлаб юборди.

Тушликдан сўнг футболчилар Бўстон даҳасида жойлашган «БЎФМ» майдонида тикланиш машғулотларини ўтказди. Бош мураббий Усмон Тошев ва мураббий Фарруҳ Ҳамроев маълум сабабларга кўра, кечаги машғулотда иштирок эта олмади. Шунинг учун машғулотларга маҳаллий мураббийлар - Искандер Галиулин, Расул Раҳмонов ва Бекзод Турғунов бошчилик қилди. Ўтган турни дисквалификация туфайли ўтказиб юборган Бахтиёр Қосимов навбатдаги ўйинга жиддий тайёргарлик кўрмоқда. Афуски Акмал Ортиқов ва Акмал Холматовни жарохатлар безовта қилмоқда. Аммо шунга қарамай ушбу футболчилар айни дамда жамоа билан бирга бўлиб, олий лигага чиқиш йўлида жамоадошларига руҳан далда бермоқда. 

Эслатиб ўтамиз, «бургутлар» 29 октябрь, якшанба куни «Соғлом авлод» стадионида Жиззах вилояти, Ғаллаорол туманининг «Ғаллакор» жамоасини қабул қилади. 1 ноябрь, чоршанба куни эса чемпионатнинг сўнгги турида «Зомин»ни қабул қилади. Ҳар иккала учрашувнинг бошланиш вақти соат 15:00га белгиланган. 

Мухлисларни стадионга чорлаймиз! Зеро, ишқиболарнинг далдаси «Андижон» учун ниҳоятда зарур!

«Андижон» матбуот хизмати.