Алишер Шоғуломов: “Стадионда ажойиб муҳит яратиб берган ишқибозларимизга раҳмат айтаман”

Иқтидорли футболчи биринчи бўлимда мазмунли харакатлари билан мухлисларда ҳам илиқ таассурот қолдирди. Ўйин ниҳоясига етгач, Шоғуломов билан клуб қароргоҳида суҳбатлашар эканмиз, у сўзини энг аввало маҳаллий ишқибозлар хусусида бошлади.  

- (Хурсанд бўлиб) Қаранг, ажойиб муҳит, шубҳасиз! Ашаддий ишқибозларимиз ғалабадан қувонганидан хатто клуб қароргоҳига ҳам келиб, байрам қилмоқда. Улар бу каби ғалабаларни соғиниб қолишган. Яратганга шукур, бугун мухлисларимиз олдида юзимиз ёруғ бўлди. Дерби ўйинларида иштирок этиш ўзгача завқ бағишлар экан. Олдин иштирок этмагандим тўғриси. Стадионда ишқибозлар ажойиб муҳитни яратиб берди. Гўёки европадаги ўйинлардагидек. Бутун ўйин давомида тинимсиз қўллаб-қувватлашди. Айнан уларнинг далдаси ҳисобига муваффақият қозондик. Бунинг учун ишқибозларга раҳмат. Очиғи, ижобий маънода ҳайратландим.  

- Ўйинга келадиган бўлсак, албатта ғалабага осонликча эришмадик. Ўйинга жиддий тайёргарлик кўргандик. Кетма-кет учта мағлубиятдан сўнг бугун фақат ютишимиз шарт эди. Шунинг учун ҳамма футболчилар биргаликда астойдил харакат қилдик.

- Йигитларнинг юқори иштиёқи ва мураббийлар штабининг тўғри тактика танлангани эвазига бугун ғолиб чиқдик.

- Бугун майдонга тушаётиб, гол уришни астойдил ният қилгандим. Чемионатдаги голларим ҳисобини очиб олдим. Насиб қилса келгусида ҳам ўз голларим билан жамоамга фойда келтиришга харакат қиламан - дейди Алишер Шоғуломов.

"Андижон" матбуот хизмати.