Алишер Азизов: “Обод” ёпилганидан жуда ҳам афсусдаман”

Қирғизистоннинг “Дордой” клуби футболчиси Алишер Азизов суҳбат жараёнида собиқ жамоаси ёпилганидан афсусда эканлигини билдирди. 

-  Сиз “Обод” жамоаси сафида тўп тепгансиз. Собиқ жамоангиз расман ёпилди дея хабарлар тарқалди. Бунга нима сабаб бўлди деб ўйлайсиз?

-  “Обод” клуби ёпилгани ҳақида эшитдим. Энди нима ҳам дердим. Менимча, молиявий муаммо сабаб клуб ёпилган бўлса керак. Пул бўлмагандан кейин нима ҳам қилсин? Тўғриси, нима сабабдан бундай бўлганини билмайман. Лекин, молиявий томондан муаммо бўлмаса жамоа ёпилмас эди.

-  Сиз ўйнаган пайтда молиявий муаммо бўлганми?

-  Йўқ, мен “Обод” сафида тўп тепган пайтимда ҳеч қандай молиявий муаммо бўлмаган. Аввал жамоада ҳамма томондан шароитлар аъло даражада эди.

-  Собиқ жамоангиз ёпилганидан афсусланаётган бўлсангиз керак?

-  Албатта, афсусланаман. Ушбу клуб учун қанча меҳнатимиз синган. Жуда ҳам кўп одам ушбу жамоа учун борини аямаганди. Пулсиз жамоани сақлаб қолиб бўлмайди. Яхши футболчилар бор эди. Шундай жамоа ёпилаётганидан жуда ҳам афсусдаман.

- Жамоа бош ҳомийси футболдан зериккан бўлиши ҳам мумкинми?

-  Шунақа ҳам бўлиши мумкин. Жамоани бош ҳомий бошқаради. Натижа бўлмагандан сўнг йиғиштириб қўйишга қарор қилган бўлиши мумкин. Мени фикримча, жамоага бошқа мураббий олиб келиб ишлашга қўйиб бериш керак эди. Мураббий бўлмаса жамоани шакллантириш қийин. Нима бўлган тақдирда ҳам биринчи лигада ўйнаб олий лигага чиққан таркибни ушлаб қолиш керак эди.

-  Ҳозирги жамоангизга “Обод”дан кимларни таклиф қилган бўлардингиз?

-  Кўпчилик футболчиларни таклиф қилган бўлардим. Мисол учун, Дониёр Ҳасанов, Шерзод Жалилов, Санжар Тўрақулов, Шоҳруз Норхонов яна бир нечта футболчиларни санаб ўтишим мумкин. Лекин, “Дордой” мен таклиф қилган футболчиларни пулини бериши қийин бўларди, деб ўйлайман. Улар менга яхши зўр футболчи бўлса жамоага таклиф қиламиз дейишганида, яхши футболчининг нархи анча қиммат туради деганман (кулиб).

-  Айни дамда “Дордой”да қандай янгиликлар бор?

-  Ҳозир жамоам анча яхши тарафга ўзгарган. Клубга янги мураббий келган Александр Крестинин. Ҳозирча рақиблар дарвозасига 14та гол уриб тўпурарлар рейтингида иккинчи ўринда турибман.

-  “Дордой”да яратилган шароитлар сизни қониқтиряптими?

-  Албатта, футболчилар учун барча шароитлар яратилган. Чемпионат ҳам қизиқарли, лекин бизникичалик эмас. Ўзбекистон чемпионати Қирғизистон чемпионатига қараганда кучлироқ. Бу ерда 3та жамоа қолганларга қараганда нисбатан кучли.

Жаҳонгир Сотволдиев суҳбатлашди