Александр Волков: "Ўзбек футболи юзи учун ҳам ўйнадик"

- Ўйинолди матбуот анжуманида “Ал-Жаиш” ғалаба учун ўйнайди, деб айтиб ўтгандим. Аввало рақиб аъзоларининг бизга таклиф қилган ҳужумкор ўйини учун миннатдорчилик билдириб ўтаман. Ҳисобни ўйин стартидаёқ очдик. Бу эса арабларнинг янада тажаввузкор ўйнашига олиб келди. “Ал-Жаиш” ҳисобни тенглаштиришгач, рақиб таблодаги ҳисобга ишониб, ортда чекинди. Бу албатта жазосиз қолмади. Ғалабадан хурсандман. Ўйлашимча, “Ал-Жаиш”га Осиё Чемпионлар лигасидаги тажриба етишмади. Бизга эса, аксинча бу жиҳат қўл келди. “Бунёдкор”нинг ОЧЛда ёқимли анъанасини давом эттирганимиздан бахтиёрмиз.

- Айтингчи, ғалаба ниманинг ҳисобига қўлга киритилди, деб ўйлайсиз?
- Бизда иштиёқ кучли бўлди. Ишонч ҳам. Ўйиндан олдин футболчилар билан суҳбатлашганимизда биз нафақат “Бунёдкор” учун, балки бутун бошли Ўзбекистон футболи шаъни учун курашишга келишиб олгандик. Агарда ғалаба қозона олсак, бу юртимизнинг Осиё майдонларидаги юзи эканлигини жуда яхши ҳис этдик. Келаси йилги Осиё Чемпионлар лигаси квотаси учун ҳам ҳаракат қилдик. Юртимизда “Пахтакор”, “Локомотив”, “Насаф” каби клублар ҳам ОЧЛда иштирок этишга лойиқ. Ўйлайманки, келаси йилги ОФК Ўзбекистонга квоталар ажратишда эътиборлироқ бўлади.

- Ўйин Сиз ўйлаган режа асосида ўтдими ёки кутилмаган бурилишлар юз бердими?
- Футболда аввалдан бирон нимани режа қилиб бўлмайди. Биз ютишни истадик ва ғалаба қозондик. Бошқа нарса ҳақида ўйлашдан энди нима наф?