"Ал Шабаб" асосан техникага таянадиган футболчиларга эга" — Ҳусайн Норчаев

Учрашувдан сўнг қаршиликлар ҳужумчиси Ҳусайн Норчаевни суҳбатга тортдик.   

"Бугунги учрашув режадагидек ўтди. Ўртоқлик учрашувларида кўпроқ куч сарфлашимиз ва "Ал Шабаб" билан баҳсга тайёр бўлишимиз керак. Кайфиятимиз аъло. Худо хоҳласа, "Ал Шабаб"ни мағлуб этишга ҳаракат қиламиз ва юртимизга яхши кайфиятда қайтамиз", – дея гап бошлади Ҳусайн Норчаев. 

- "Ордабаси"нинг ўйин услуби, жисмоний тайёргарлиги Европа кучли клублариникига ўхшаб кетди...

- Тўғри, уларнинг ҳимоячилари кўпроқ бўйи узун ва бақувват футболчилар экан. Бошқа футболчилари ҳам шундай. Улар шундай футбол ўйнайди, 1-2 та ўйинларини кўргандим. "Ордабаси" тезлик ва кучга таянган ҳолда тўп тепади. 

- Йиғиндаги ўйинлар ҳақида қандай фикрдасиз? "Насаф" 8 та ўйин ўтказишга улгурди...

- Мураббийлар штаби кучли рақибларни танлаган экан. Яхши тайёргарлик кўрдик. Худо хоҳласа, энди ҳаммасини "Ал Шабаб" билан баҳсда кўриб оламиз. 

- Жамоа назарий машғулотларда "Ал Шабаб" иштирокидаги учрашувларни ҳам кўриб бордими?

-  Ҳа, ўрганиб чиқдик. Худо хоҳласа, мураббийлар ўзига яраша яхши тактика танлашади.  

- Туркия йиғинидаги рақиблар ўйини билан таққосласак, "Ал Шабаб"нинг ўйини қайси жамоаникига ўхшаб кетади?

- Кўпроқ Грузиянинг "Дила" жамоаси (2:0 – таҳр.) ўйини ўхшар экан.  Жамоа асосан техникага таянадиган футболчиларга эга. "Ал Шабаб" ҳам худди шундай.