"Ал Иттиҳод" атиги иккита ўйиндан сўнг мураббийни бўшатди

Гап Жидда шаҳрининг "Ал Иттиҳод" клуби ҳақида бормоқда. Май ойида бу жамоага янги бош мураббий этиб Рамон Диас тайинланганди. Аммо Саудия чемпионатининг дастлабки икки туридан сўнг аргентиналик мутахассисга чиқиш эшиклари кўрсатилди. Бунга сабаб "Ал Иттиҳод" ҳар иккала беллашувда мағлубиятга учради.

"Йўлбарслар" дастлаб сафарда "Ал Шабаб"га 0:1, кейин эса ўз уйларида "Ал Қодисия"га 0:3 ҳисобида имкониятни бой беришди. Айниқса уйдаги йирик мағлубият клуб раҳбарининг жаҳлини чиқариб юборди ва ўйин тугагач мураббийни ишдан олди. Клуб президенти Наваф Ал Муқайрин бу борада шундай деди: "Кетма-кет иккита мағлубият учун мухлисларимиздан узр сўрайман. Бош мураббий ҳақида якуний тўхтамга келиш осон бўлмади. Чунки мураббий билан билан гаплашганимизда ҳаммаси яхши бўлишини айтганди".

Маълумот учун, "Ал Иттиҳод" Саудия Арабистонининг 8 карра чемпиони ҳисобланади. Қизиғи шундаки, Рамон Диас шу йилнинг февраль ойида "Ал Ҳилол" клуби бош мураббийлигидан кетганди, энди бўлса "Ал Иттиҳод"дан ҳам ҳайдалди. Айни пайтда "Ал Иттиҳод" турнир жадвалида энг охирги ўринда бормоқда.