Акбар Тўраев: "Биринчи даврадан сўнг жамоада қолиш ёки қолмаслигим ҳақида бир нарса дея олмайман"

- Учрашувда тўлиқ устунлик биз томонда бўлди. Аммо "Зоб Аҳан" яхши қаршилик кўрсатди. Юзага келтирилган вазиятлардан фойдаланашимиз лозим эди. Худо хоҳласа Эронда бўладиган жавоб баҳсида ғалаба қозонамиз деган умиддамиз. Тўғри, жамоамиз ОЧЛ гуруҳ босқичи доирасидаги уй учрашувларида анчадан буён ғалаба қозона олмаяпти. Бу нарса футболчиларнинг руҳияти билан боғлиқ эмас. Бу томонлама тайёргарлигимиз яхши даражада. Машғулотларда барча кўтаринки руҳ билан шуғулланади. Ўйлашимча, жамоамизга озгина омад етишмаяпти. Ҳали олдинда яна учта тур бор. Шундай охирига курашни давом эттирамиз ва бунинг учун бор кучимизни сарфлаймиз. Захирада қолиб кетаётганимга келадиган бўлсак, бу мураббийларнинг танлови. Улар Мурод ака Зуҳуровга ишонч билдиришмоқда. Лекин машғулотларда мен ҳам ўзимни кўрсатиш учун меҳнат қиляпман. Ҳар доим ўйинга тушишга тайёрман. Бу борада муаммо йўқ. Бизларда айни пайтда асосий таркиб ёки захира футболчиси деган тушунча йўқ. Ҳамма бир жамоа бўлиб бирлашган ва барча бир хил даражада меҳнат қилмоқда. Тўғри, ўйин амалиёти керак. Биринчи даврадан сўнг нима бўлишини вақт кўрсатади. Бу борада бир нарса дея олмайман. Ҳамма нарса бўлиши мумкин.